பள்ளி கல்வி - வேளாண்மை உள்ளிட்ட முக்கிய துறைகளுக்கு கூடுதல் நிதி

சென்னை - பள்ளி கல்வித்துறை, வேளாண்மை துறை உள்ளிட்ட முக்கிய துறைகளுக்கு வரும் நிதியாண்டிற்கு கூடுதல் நிதி ஒதுக்கீடு செய்யப்பட்டுள்ளது.

தமிழக சட்டசபையில் நேற்று பட்ஜெட் தாக்கல் செய்து முதலமைச்சர் ஓ.பன்னீர்செல்வம் நிதி ஒதுக்கீடு தொடர்பாக   வெளியிட்ட முக்கிய அறிவிப்புகள் வருமாறு:-

* பள்ளி கல்வித்துறைக்கு 20,936.50 கோடி ரூபாய் ஒதுக்கீடு செய்யப்பட்டுள்ளது.
*  வரும் நிதியாண்டில் உணவு மானியத்திற்கு 5300 கோடி ரூபாய் நிதி ஒதுக்கப்பட்டுள்ளது. 
* வேளாண்மை துறைக்கு இதுவரை இல்லாத அளவிற்கு இந்த ஆண்டு 6613.68 கோடி ரூபாய் ஒதுக்கீடு செய்யப்பட்டுள்ளது.
* தேசிய நகர்ப்புற வாழ்வாதார திட்டத்திற்கு 250 கோடி ரூபாய்  மாநில சமச்சீர் வளர்ச்சி நிதிக்கு 100 கோடி ரூபாய் ஒதுக்கப்பட்டுள்ளது.
* ராமநாதபுரம் மாவட்டம் குதிரை வாய்மொழி, தூத்துக்குடி மாவட்டம் ஆலந்தழை ஆகிய இடங்களில் நாளொன்றுக்கு 60 மில்லியன் லிட்டர் திறன் கொண்ட கடல்நீரை குடிநீராக்கும்  திட்டங்கள் 1947 கோடி ரூபாய் மதிப்பீட்டில் செயல்படுத்தப்படும்.
* குறு,சிறு மற்றும் நடுத்தர தொழில்துறைக்கு 365.91 கோடி ரூபாய் ஒதுக்கீடு செய்யப்பட்டுள்ளது.
* தொழில் புரிவதற்கான சூழலை எளிமையாக்குவதற்காக ஒற்றைச்சாளர முதலீட்டாளர் இணையதளம் வரும் நிதியாண்டில் தொடங்கப்படும்.
* இந்த ஆண்டு போக்குவரத்து துறைக்கு டீசல் மானியமாக 500 கோடி ரூபாயும், மாணவ, மாணவியருக்கு இலவச பேருந்து பயண மானியமாக 480 கோடி ரூபாய் ஒதுக்கப்பட்டுள்ளது
.* நெடுஞ்சாலை துறைக்கு மொத்தமாக  இந்த பட்ஜெட்டில் 8228.24 கோடி ரூபாய் ஒதுக்கப்பட்டுள்ளது.
* மின்சாரத்துறைக்கென மொத்த நிதி உதவியாக 13,586 கோடி ரூபாய் ஒதுக்கப்பட்டுள்ளது.
 * நீர்பாசனத்துறைக்கு  இந்த பட்ஜெட்டில் 3,727.37 கோடி ரூபாய் ஒதுக்கீடு செய்யப்பட்டுள்ளது.
* பொது விநியோக திட்டத்திற்கு  கீழ் உணவு மானியத்திற்கான 5300 கோடி ரூபாய் நிதி ஒதுக்கப்பட்டுள்ளது.* வரும் நிதியாண்டில் சாலை பாதுகாப்பு நிதிக்காக 165 கோடி ரூபாய் ஒதுக்கப்பட்டுள்ளது.
* நீதி நிர்வாக துறைக்கு 809.70 கோடி ரூபாய் ஒதுக்கப்பட்டுள்ளது.
* காவல் துறைக்கான கட்டிடங்கள் கட்டுவதற்கு மட்டும் 538.49 கோடி ரூபாய் ஒதுக்கப்பட்டிருக்கிறது.
* தேசிய நகர்புற மற்றும் தமிழ்நாடு நகர்புற வாழ்வாதார திட்டங்களுக்காக 357 கோடி ரூபாய் ஒதுக்கப்பட்டிருக்கிறது.
* மலைப்பகுதிகளில் சிறப்பு கவனம் செலுத்துவதற்காக 705 கோடி ரூபாய் நிதி ஒதுக்கீட்டில் சிறப்பு பகுதி மேம்பாட்டு திட்டம் ஒன்று தொடங்கப்படும்.
* பொருளாதாரம் மற்றும் புள்ளியியல் துறை, தமிழ்நாடு மின் ஆளுமை முகமையுடன் இணைந்து தரவு ஆய்வு மையம் ஒன்றை அரசு ஏற்படுத்தும்.

இத்தகைய மையத்தை ஏற்படுத்தும் முதல் மாநிலம் தமிழ்நாடு என்பது குறிப்பிடத்தக்கது. இவ்வாறு முதலமைச்சர் ஓ. பன்னீர்செல்வம் கூறினார்.