குற்றால அருவிகளில் தண்ணீரின் வரத்து அதிகரிப்பு -குளிக்க தடை விதிப்பு

நெல்லை
தென்காசி மற்றும் செங்கோட்டை பகுதியில் சாரல் மழை பெய்ததால் குற்றால அருவிகளில் தண்ணீர் வரத்து ஏற்பட்டுள்ளது.
நெல்லை மாவட்டத்தில் பருவமழை பொய்த்து விட்டதால் விவசாய நிலங்கள் பயிர் செய்ய முடியாமல் வறண்டன. நிலத்தடி நீர் கிடு கிடு என குறைந்ததால் குடிநீர் பற்றாக்குறையும் தலை விரித்தாடுகிறது. இந்நிலையில் 21ம் தேதி காலை முதல் இரவு வரை தென்காசி, செங்கோட்டை, குற்றாலம் மற்றும் அதன் சுற்று வட்டாரப் பகுதியில் சாரல் மழை பெய்தது. மழை மேக கூட்டத்துடன் விட்டு விட்டு சாரல் மழை தொடர்ந்ததால் மாலை நேரத்தில் குளிர் அதிகமாக இருந்தது.போதிய மழை இன்றி குற்றால அருவிகளில் தண்ணீர் இல்லாமல் வறண்டு இருந்த நிலையில் குற்றாலம் மலைப் பகுதியிலும் சாரல் மழை தலை காட்டியதால் அருவிகளுக்கு தண்ணீர் வரத்து ஏற்பட்டது. மாலை நேரத்தில் மெயினருவியில் பரவலாக தண்ணீர் வரத்து இருந்தது. மேலும் ஐந்தருவியிலும் தண்ணீர் வரத்து ஏற்பட்டது. சிற்றருவி, புலியருவியிலும் சிறிதளவு தண்ணீர் விழுந்தது. மெயின் அருவியில் தொடர்ந்து நீரின் வரத்து அதிகரித்து கொண்டே போனதால் ஆர்ச்சை தாண்டி தண்ணீர் விழுந்தது இதனால் அருவியில் சுற்றுலாவாசிகள் குளிக்க தடை விதிக்கப்பட்டது