புதுச்சேரி பா.ஜ.க. நியமன எம்.எல்.ஏ. சங்கர் காலமானார்

புதுச்சேரி : புதுச்சேரி சட்டசபை பா.ஜ.க. நியமன எம்.எல்.ஏ.வான சங்கர் (வயது 70) மாரடைப்பால் காலமானார்.

புதுச்சேரியில் காங்கிரஸ் தலைமையிலான ஆட்சி நடந்து வருகிறது. சட்டசபைக்கு தேர்ந்தெடுக்கப்பட்ட 30 எம்.எல்.ஏ.க்கள் உள்ளனர். இவர்கள் தவிர மாநில அரசின் பரிந்துரையின் பேரில் மத்திய அரசு 3 பேரை எம்.எல்.ஏ.க்களாக நியமிக்கலாம்.

இந்த நிலையில் பாரதிய ஜனதா கட்சியை சேர்ந்த சாமிநாதன், சங்கர், செல்வகணபதி ஆகியோரை நியமன எம்.எல்.ஏ.க்களாக மத்திய அரசு நியமித்தது. அவர்களுக்கு கவர்னர் கிரண்பேடி பதவிப் பிரமாணம் செய்து வைத்தார். 

இந்த நிலையில் புதுச்சேரி சட்டசபை பா.ஜ.க. நியமன எம்.எல்.ஏ.வான சங்கர் (வயது 70) மாரடைப்பால் காலமானார். இவர் புதுச்சேரி மாநில பா.ஜ.க. பொருளாளராக இருந்தவர். சங்கர் மறைவால் புதுச்சேரி சட்டசபையில் நியமன எம்.எல்.ஏ.க்களின் எண்ணிக்கை 3-லிருந்து 2-ஆக குறைந்துள்ளது.