முக்கிய செய்திகள்

செப்டம்பர் மாத ஜி.எஸ்.டி வசூல் ரூ.1,17,010 கோடி

வெள்ளிக்கிழமை, 1 அக்டோபர் 2021      இந்தியா
gst-2021-10-01

கடந்த செப்டம்பர் மாதத்தில், நாட்டின் மொத்த ஜி.எஸ்.டி வருவாயாக ரூ.1,17,010 கோடி வசூலாகியுள்ளது, இதில் மத்திய ஜி.எஸ்.டியாக ரூ.20,578 கோடியும், மாநில ஜி.எஸ்.டியாக ரூ.26,767 கோடியும் ஐஜி.எஸ்.டி ஆக ரூ.60,911 கோடியும் (இறக்குமதி பொருட்களுக்காக வசூலிக்கப்பட்ட ரூ.29,555 கோடி உட்பட) மற்றும் செஸ் வரியாக ரூ.8,754 கோடியும் (இறக்குமதி பொருட்களுக்காக வசூலிக்கப்பட்ட ரூ.623 கோடி உட்பட) வசூலாகியுள்ளது.

இதுகுறித்து மத்திய நிதியமைச்சகம் வெளியிட்ட கூடுதல் தகவல்கள் வருமாறு.,

ஐஜி.எஸ்.டி-யிலிருந்து வழக்கமான பட்டுவாடாவாக மத்திய ஜி.எஸ்.டிக்கு ரூ.28,812 கோடியும் மாநில ஜி.எஸ்.டிக்கு ரூ.24,140 கோடியும் அரசு வழங்கியுள்ளது. வழக்கமான பட்டுவாடாக்களுக்குப் பிறகு மத்திய அரசு மற்றும் மாநில அரசுகளின் மொத்த வருவாய், செப்டம்பர் 2021ல் மத்திய ஜி.எஸ்.டியாக ரூ.49,390 கோடியும், மாநில ஜி.எஸ்.டியாக ரூ.50,907 கோடியும் கிடைத்துள்ளது.

2021 செப்டம்பர் மாத வருவாய் கடந்த ஆண்டு இதே காலத்தில் கிடைத்த ஜி.எஸ்.டி வருவாயை விட 23% அதிகமாகும். கடந்தாண்டு இதே மாதத்தில் கிடைத்ததை விட, இந்த மாதத்தில் பொருட்கள் மூலம் கிடைக்கும் வருவாய் 30% அதிகம் மற்றும் உள்நாட்டு பரிவர்த்தனை மூலம் கிடைக்கும் வருவாய் (சேவை இறக்குமதி உட்பட) 20% அதிகமாகும். செப்டம்பர் 2019 இல் ரூ.91,916 கோடி வருவாய் கிடைத்த நிலையில் 2020 செப்டம்பரிலேயே அதைவிட 4% அதிக வருவாய் கிடைத்தது.

நடப்பாண்டின் 2-வது காலாண்டில், மாதாந்திர மொத்த ஜி.எஸ்.டி வசூல் சராசரி ரூ.1.15 லட்சம் கோடி, இது ஆண்டின் முதல் காலாண்டில் கிடைத்த மாதாந்திர வசூலான ரூ.1.10 லட்சம் கோடியை விட 5% அதிகமாகும்.  இது நாட்டின் பொருளாதாரம் வேகமாக எழுச்சி பெற்று வருவதை தெளிவாக உணர்த்துகிறது. பொருளாதார வளர்ச்சியுடன், வரி ஏய்ப்பு தடுப்பு நடவடிக்கைகள், குறிப்பாக போலி ரசீது தயாரிப்பவர்களுக்கு எதிரான நடவடிக்கை ஜி.எஸ்.டி வசூல் அதிகரிப்புக்கு காரணமாகியுள்ளது. வருவாய்க்கான இந்த சாதகமான போக்கு தொடர்வதுடன் ஆண்டின் இரண்டாவது அரையாண்டில் கூடுதல் வருவாய் கிடைக்கச் செய்யும். மாநிலங்களின் ஜி.எஸ்.டி வருவாய் பற்றாக்குறையை ஈடுகட்டுவதற்கான இழப்பீடாக ரூ.22 ஆயிரம் கோடியையும் மத்திய அரசு விடுவித்துள்ளது.

 

தமிழ்நாட்டின் ஜி.எஸ்.டி வருவாய் செப்டம்பர் 2020-ல் 6,454 கோடி ரூபாயாக இருந்த நிலையில், 2021 செப்டம்பரில் 21% அதிகரித்து 7,842 கோடி ரூபாய் வசூலாகியுள்ளதாக மத்திய நிதி அமைச்சகம் தெரிவித்துள்ளது.

இதை ஷேர் செய்திடுங்கள்:

View all comments

வாசகர் கருத்து