நியூசி.க்கு எதிரான 2-வது டெஸ்ட்: இந்திய அணி இமாலய வெற்றி தொடரையும் கைப்பற்றியது

மும்பையில் நடந்த நியூஸிலாந்து அணிக்கு எதிரான 2-வது மற்றும் கடைசி டெஸ்ட் போட்டியில் 372 ரன்கள் வித்தியாசத்தில் இந்திய அணி வென்று டெஸ்ட் தொடரை 1-0 என்ற கணக்கில் கைப்பற்றியுள்ளது. இந்திய மண்ணில் இந்திய அணி மிகப்பெரிய ரன்கள் வித்தியாசத்தில் பெற்ற வெற்ற இதுவாகும். ஆட்டநாயகனாக மயங்க் அகர்வாலும், தொடர் நாயகனாக அஸ்வினும் தேர்ந்தெடுக்கப்பட்டனர்.

540 ரன்கள் இலக்கு...

நேற்று 4-வது நாள் ஆட்டம் தொடங்கிய 43 நிமிடங்களில் நியூஸிலாந்து அணி மீதமுள்ள 5 விக்கெட்டுகளையும் இழந்து தோல்வி அடைந்தது. 540 ரன்கள் சேர்த்தால் வெற்றி எனும் இலக்குடன் களமிறங்கிய நியூஸிலாந்து அணி, 56.3 ஓவர்களில் 167 ரன்களில் ஆட்டமிழந்து 372 ரன்கள் வித்தியாசத்தில் தோல்வி அடைந்தது.

4 விக்கெட்டுகள்...

ரவிச்சந்திரன் அஸ்வின் 34 ரன்கள் கொடுத்து 4 விக்கெட்டுகளை வீழ்த்தினார், முதல் இன்னிங்ஸில் 4 விக்கெட் என மொத்தம் 42 ரன்களுக்கு 8 விக்கெட்டுகளை வீழ்த்தியுள்ளார். ஒரு டெஸ்ட் போட்டியில் 5 விக்கெட்டுகளை வீழ்த்தாமல் 8 விக்கெட்டுகளை வீழ்த்தும் சிறந்த பந்துவீச்சு இதுவாகும். இதற்கு முன் கடந்த 2002-ம் ஆண்டு ஷார்ஜாவில் நடந்த பாகிஸ்தானுக்கு எதிரான டெஸ்ட் போட்டியில் ஆஸி. ஜாம்பவான் ஷேன் வார்ன் 24 ரன்களுக்கு 8 விக்கெட்டுகளை வீழ்த்தியதற்குப் பின் சிறந்த பந்துவீச்சு அஸ்வினுடையதாகும்.

300-வது விக்கெட்...

அதுமட்டுமல்லாமல் இந்திய மண்ணில் அஸ்வின் தனது 300-வது விக்கெட்டையும் வீழ்த்தி சாதனை படைத்துள்ளார். கான்பூர் டெஸ்ட்டிலே இந்திய அணி வெற்றி பெற வேண்டியது. ஆனால், கடைசியில் ஒரு விக்கெட்டை வீழ்த்த முடியாமல் வெற்றியை நழுவவிட்டது. அந்தத் தவறை இதில் செய்யாமல் பிரம்மாண்டமான வெற்றியைப் பெற்றுள்ளது.

அஜாஸ் சாதனை...

இந்த டெஸ்ட் போட்டியில் இந்திய அணி வெற்றி பெற்றாலும் நியூஸிலாந்து அணியின் சுழற்பந்துவீச்சாளர் அஜாஸ் படேலின் சாதனை பொறிக்கப்பட வேண்டியது. இந்தியாவுக்குப் பயணம் மேற்கொண்டு இந்திய அணிக்கு எதிராகவே 10 விக்கெட்டுகளை வீழ்த்திய அவரின் சாதனை மிக முக்கியமான ஒன்று. கிரிக்கெட் உலகிலேயே 10 விக்கெட்டுகளை வீழ்த்திய அனில் கும்ப்ளே, லேக்கருக்கு அடுத்தாற்போல், படேலும் இணைந்துவிட்டார். அதுமட்டுமல்லாமல் 21 ஆண்டுகளாக இங்கிலாந்து முன்னாள் ஆல்ரவுண்டர் இயான் போத்தம் வைத்திருந்த சாதனையையும் படேல் முறியடித்துவிட்டார்.

36 விக்கெட்டுகள்... 

இந்த டெஸ்ட் போட்டி முழுவதுமே இரு அணிகளிலும் வேகப்பந்துவீச்சாளர்களைவிட சுழற்பந்துவீச்சாளர்களின் கையே ஓங்கியிருந்தது. ஒட்டுமொத்தமாக இரு அணிகளிலும் சேர்த்து 36 விக்கெட்டுகள் வீழ்த்தப்பட்டுள்ளன. இதில் 33 விக்கெட்டுகளை சுழற்பந்துவீச்சாளர்கள் மட்டுமே எடுத்துள்ளனர்.

140 ரன்களுடன்...

இந்திய அணி முதல் இன்னிங்ஸில் 325 ரன்களுக்கும், நியூஸிலாந்து அணி 62 ரன்களுக்கும் ஆட்டமிழந்தது. 263 ரன்கள் முன்னிலையுடன் 2-வது இன்னிங்ஸை ஆடிய இந்திய அணி 7 விக்கெட் இழப்புக்கு 276 ரன்கள் சேர்த்து டிக்ளேர் செய்தது. 540 ரன்கள் இலக்குடன் களமிறங்கிய நியூஸிலாந்து அணி 3-ம் நாள் ஆட்டநேர முடிவில், 5 விக்கெட் இழப்புக்கு 140 ரன்கள் சேர்த்திருந்தது. நியூஸிலாந்து அணியில் ஹென்றி நிகோலஸ் 36 ரன்களுடனும், ரச்சின் ரவிந்திரா 2 ரன்களுடனும் களத்தில் ஆட்டமிழக்காமல் இருந்தனர். இருவரும் நேற்றைய ஆட்டத்தைத் தொடர்ந்தனர்.

டக் அவுட்டில்...

ஆடுகளம் காலை நேரத்தில் ஈரப்பதத்துடன் இருந்ததால், அஸ்வின், ஜெயந்த் யாதவ் பந்துவீச்சில் பந்து நன்றாக எழும்பி, சுழன்றது. இதனால் தொடக்கத்திலேயே இருவரின் பந்துவீச்சை சமாளித்து ஆட நியூஸிலாந்து வீரர்கள் சிரமப்பட்டனர். ஜெயந்த் யாதவ் பந்துவீச்சில் 18 ரன்னில் ரவிந்திரா, புஜாராவிடம் கேட்ச் கொடுத்து வெளியேறினார். ஜெயந்த் யாதவ் வீசிய 54-வது ஓவரின் 2-வது பந்தில் ஜேமிஸன் கிளீன் போல்டாகி ஆட்டமிழந்தார். அதே ஓவரின் கடைசிப் பந்தில் சவுதி கால்காப்பில் வாங்கி டக் அவுட்டில் வெளியேறினர்.

அஸ்வின் - ஜெயந்த் ...

அடுத்துவந்த சோமர்வில்லே ஒரு ரன்னில் யாதவ் பந்துவீச்சிலும், நிகோலஸ் 44 ரன்னில் அஸ்வின் பந்துவீச்சில் சாஹாவால் ஸ்டெம்பிங் செய்யப்பட்டு ஆட்டமிழந்தார்கள். 162 ரன்கள் வரை 5 விக்கெட்டுகளை இழந்திருந்த நியூஸிலாந்து அணி அடுத்த 5 ரன்களுக்குள் 5 விக்கெட்டுகளை இழந்து தோல்வி அடைந்தது. 2-வது இன்னிங்ஸில் அஸ்வின், ஜெயந்த் யாதவ் தலா 4 விக்கெட்டுகளையும், படேல் 2 விக்கெட்டுகளையும் வீழ்த்தினர்.

இந்திய அணி சாதனை

மும்பை வான்கடே மைதானத்தில் நடைபெற்ற நியூசிலாந்து அணிக்கு எதிரான 2-வது டெஸ்ட் போட்டியில் விராட் கோலி தலைமையிலான இந்திய அணி 372 ரன்கள் வித்தியாசத்தில் அபார வெற்றி பெற்றது. இந்த வெற்றியின் மூலம் 2 போட்டிகள் கொண்ட தொடரை 1-0  என்ற கணக்கில் இந்தியா கைப்பற்றியது. மேலும், சொந்த மண்ணில் தொடர்ச்சியாக 14 டெஸ்ட் தொடர்களை வென்று சாதனைப் படைத்துள்ளது.

அதேபோல் இந்திய டெஸ்ட் அணி விராட் கோலி தலைமையில் ஆதிக்கும் செலுத்தி வருகிறது. 2014-ம் ஆண்டு முதல் இந்திய டெஸ்ட் கிரிக்கெட் அணி கேப்டனாக பொறுப்பேற்று 66 போட்டிகளில் அணியை வழி நடத்தியுள்ளார். இதில் 39 போட்டிகளில் இந்திய அணி வெற்றி பெற்றுள்ளது. 16 போட்டிகளில் தோல்வி அடைந்துள்ளது. 11 போட்டிகள் டிராவில் முடிந்துள்ளது.

கோலி புதிய சாதனை

சர்வதேச கிரிக்கெட்டில் இதுவரை எந்தவொரு வீரரும் டெஸ்ட், ஒருநாள், டி20 என மூன்று வகை கிரிக்கெட் போட்டிகளிலும் 50 வெற்றிகளில் பங்கேற்றதில்லை. மும்பை டெஸ்டில் இந்திய அணி வெற்றி பெற்றதன் மூலம் டெஸ்ட் கிரிக்கெட்டில் இந்திய அணியில் இடம்பெற்று 50-வது வெற்றியில் பங்களித்துள்ளார் விராட் கோலி. 

இதனால் டெஸ்ட், ஒருநாள், டி20 என மூன்று வகை கிரிக்கெட் போட்டிகளிலும் 50 வெற்றிகளைக் கண்ட முதல் வீரர் என்கிற பெருமையைப் பெற்றுள்ளார். டெஸ்டுகள்: ஆட்டங்கள் - 97, வெற்றிகள் - 50, ஒருநாள்: ஆட்டங்கள் - 254, வெற்றிகள் - 153, டி20: ஆட்டங்கள் - 95, வெற்றிகள் - 59.