மக்களுக்கு பயன்தராத, துன்பங்கள் நிறைந்த தி.மு.க.வின் ஓராண்டு ஆட்சி : அ.தி.மு.க. ஒருங்கிணைப்பாளர் ஓ.பி.எஸ். வேதனை

சென்னை : மக்களுக்கு பயன்தராத துன்பங்கள் நிறைந்த துயரமான ஆட்சி திமுக-வின் ஓராண்டு ஆட்சி என்பதை தமிழக மக்கள் உணர்ந்து விட்டார்கள் என்று அ.தி.மு.க. ஒருங்கிணைப்பாளரும், தமிழ சட்டப்பேரவை எதிர்க்கட்சி துணைத் தலைவருமான ஓ.பன்னீர்செல்வம் கூறியுள்ளார்.

இதுகுறித்து ஓபிஎஸ் வெளியிட்டுள்ள அறிக்கையில்: "2021ம் ஆண்டு தமிழக சட்டப்பேரவைக்கான பொதுத் தேர்தலில், திமுக-வின் பொய்யான, போலியான, நிறைவேற்ற முடியாத, சாத்தியமற்ற வாக்குறுதிகளை நம்பி மக்கள் வாக்களித்ததன் விளைவாக தமிழகத்தில் திமுக ஆட்சி துரதிர்ஷ்டவசமாக அமைந்துவிட்டது. இதன் காரணமாக, கடந்த ஓராண்டில் பொதுமக்கள் இன்பங்களை மறந்து துன்பங்களை மட்டுமே அனுபவித்து வருகின்றனர். மக்கள் எந்த வாக்குறுதிகளை நம்பி திமுக-விற்கு வாக்களித்தார்களோ அந்த வாக்குறுதிகள் எதுவும் நிறைவேற்றப்படவில்லை.

உதாரணமாக, திமுக-வின் முக்கியமான வாக்குறுதிகளில் ஒன்று நீட் தேர்வு ரத்து. நீட் தேர்வை ரத்து செய்ய கழக அரசு அமைந்ததும் முதல் சட்டப் பேரவைக் கூட்டத் தொடரிலேயே சட்டம் இயற்றப்படும் என்று திமுக-வின் தேர்தல் அறிக்கையில் குறிப்பிடப்பட்டு இருக்கிறது. ஓரே கையெழுத்தில் நீட் தேர்வு ரத்து செய்யப்படும் என மேடைக்கு மேடை தேர்தல் பிரச்சாரத்தின்போது திமுக தலைவர்களால் பேசப்பட்டது. ஆனால் திமுக ஆட்சி அமைந்து ஓராண்டாகியும் நீட் தேர்வு ரத்து செய்யப்படவில்லை. 

அடுத்த முக்கியமான வாக்குறுதி கல்விக் கடன் ரத்து. "30 வயதுக்கு உட்பட்ட தமிழகக் கல்லூரி மாணவர்களின் கல்விக் கடன்கள் தள்ளுபடி செய்யப்படும்" என்று திமுக-வின் தேர்தல் அறிக்கையில் குறிப்பிடப்பட்டு உள்ளது. ஓராண்டாகியும் இது குறித்து திமுக அரசு வாய் திறக்கவில்லை.

மற்றொரு முக்கியமான வாக்குறுதி நகைக் கடன் ரத்து. திமுக அரசு அமைந்ததும் கூட்டுறவு வங்கிகளில் பெறப்பட்ட 5 சவரனுக்கு உட்பட்ட நகைகள் ரத்து செய்யப்படும் என திமுக-வின் தேர்தல் அறிக்கையில் குறிப்பிடப்பட்டு இருந்தது. இது ஒருபுறம் என்றால், "நகைக் கடன் வாங்காதவர்கள் எல்லாம் வாங்கிக் கொள்ளுங்கள், ஸ்டாலின்தான் ஆட்சிக்கு வரப் போகிறார், எல்லா கடனையும் தள்ளுபடி செய்துவிடுவார்" என்ற பிரச்சாரம் வேறு மறுபுறம். ஆனால், ஆட்சிக்கு வந்தவுடன் பல்வேறு நிபந்தனைகளை விதித்து கிட்டத்தட்ட 75 விழுக்காடு பயனாளிகளின் நகைக் கடன்களை தள்ளுபடி செய்ய முடியாது என அரசு அறிவித்தது.

மகளிர் எதிர்பார்த்த முக்கியமான வாக்குறுதி மாதம் 1,000 ரூபாய் உரிமைத் தொகை. பெரும்பாலானோர் இந்த வாக்குறுதியை நம்பி திமுக-விற்கு வாக்களித்தார்கள். தேர்தல் அறிக்கையில் மகளிர் உரிமைத் தொகை என்று குறிப்பிட்விட்டு, நிதிநிலை அறிக்கையில் இது ஏழ்மையானவர்களுக்கான திட்டம் என்று திமுக அரசு கூறுகிறது. இதன்மூலம், மொத்த மகளிரில் பத்து விழுக்காட்டிற்கும் குறைவான மகளிருக்கு அளித்துவிட்டு இந்தத் திட்டம் நிறைவேற்றப்பட்டுவிட்டது என்று கூறிக் கொள்ளப் போகிறது திமுக இது ஒருவிதமான ஏமாற்று வேலை. இதேபோன்று, சமையல் எரிவாயு சிலிண்டருக்கு 100 ரூபாய் மானியம் என்ற வாக்குறுதியை திமுக அறிவித்தது. எரிவாயுவை வீடுகள்தோறும் வழங்கும் பணியை மத்திய அரசின் எண்ணெய் நிறுவனங்கள் மேற்கொள்கின்றன.

வாக்குறுதிகள் தான் நிறைவேற்றப்படவில்லை, நேர்மையான, சுதந்திரமான, நியாயமான, நீதி தவறாத ஆட்சி நடக்கிறதா என்றால் அதுவும் இல்லை. மக்கள் அன்றாடம் வேதனைகளை சந்தித்துக் கொண்டிருக்கிறார்கள். சட்டம்-ஒழுங்கு தான் இப்படி என்றால், மின்சாரத் துறை இதைவிட மோசமாக இருக்கிறது. திமுக ஆட்சி பொறுப்பேற்றதிலிருந்தே மின்வெட்டு என்பது அடிக்கடி ஏற்படுகிறது 

திமுக அரசின் நிர்வாகத் திறமையின்மை காரணமாக, அத்தியாவசியப் பொருட்களின் விலை அதிகரித்துக் கொண்டே செல்கிறது, கட்டுமானப் பொருட்களின் விலை கட்டுக்கடங்காமல் சென்று கொண்டே இருக்கிறது. இந்தச் சூழ்நிலையில், கரோனாவால் பாதிக்கப்பட்ட பொருளாதாரம் மீண்டும் மேம்படும் வரையில் சொத்து வரி அதிகரிக்கப்படமாட்டாது என்ற வாக்குறுதியையும் மீறி, சொத்து வரியையும், குடிநீர் வரியையும் உயர்த்தி எரிகிற நெருப்பில் எண்ணெயை திமுக ஊற்றியிருக்கிறது.

நீட் தேர்வு ரத்து பிரச்சினையில் மேதகு ஆளுநரை எதிர்க்கின்ற திமுக அரசு, வரிப் பகிர்வு விஷயத்தில் மத்திய அரசை எதிர்க்கின்ற திமுக அரசு, முல்லைப் பெரியாறு விஷயத்தில் பல்வேறு இடையூறுகளை தமிழகத்திற்கு அளித்துக் கொண்டிருக்கின்ற கேரள அரசை எதிர்க்கவோ, மேகதாது அணைப் பிரச்சினையில் கர்நாடக காங்கிரஸ் கட்சியை எதிர்க்கவோ திமுக தயக்கம் காட்டுவது வியப்பாக இருக்கிறது. ஒருவேளை இதுதான் திராவிட மாடல் போலும்! மொத்தத்தில், மக்களுக்குப் பயன் தராத துன்பங்கள் நிறைந்த துயரமான ஆட்சி திமுக-வின் ஓராண்டு ஆட்சி என்பதை தமிழக மக்கள் உணர்ந்து விட்டார்கள். இவ்வாறு அறிக்கையில் அவர் கூறியுள்ளார்.