கோவை, அ.தி.மு.க. -பா.ஜ.க. கூட்டணி முறிவு தொடர்பாக தேசிய தலைமை பேசும் என்று தமிழக பா.ஜ.க. மாநில தலைவர் அண்ணாமலை கூறினார். 

அ.தி.மு.க. பொதுச்செயலாளர் எடப்பாடி பழனிசாமி தலைமையில் நடந்த மாவட்ட செயலாளர்கள்  கூட்டத்தில் பா.ஜ.க.வுடனான கூட்டணியை முறித்துக் கொள்வதாக முடிவு எடுக்கப்பட்டது. அதன்படி, பா.ஜ.க.வுடன் கூட்டணி இல்லை என அ.தி.மு.க. அதிகாரப்பூர்வமாக அறிவித்துள்ளது. 

இந்த நிலையில், கோவையில் நடைபயணம் மேற்கொண்டிருந்த பா.ஜ.க. மாநில தலைவர் அண்ணாமலையிடம் இது தொடர்பாக செய்தியாளர்கள் கேள்வியெழுப்பினர். அப்போது அண்ணாமலை கூறியதாவது, 

கோவையில் என் மண் என் மக்கள் யாத்திரை நடைபெற்று கொண்டிருக்கிறது. யாத்திரையில் அரசியல் குறித்து பேச விரும்பவில்லை. அ.தி.மு.க.வின் அறிக்கையை படித்தோம். அ.தி.மு.க. முடிவு குறித்து தற்போது எதுவும் பேச விரும்பவில்லை. இது குறித்து பின்னர் பத்திரிகையாளர் சந்திப்பில் பேசுகிறேன்.  

பா.ஜ.க. ஒரு தேசிய கட்சி. அனைத்திற்கும் ஒரு நடைமுறை உள்ளது. தேசிய தலைவர்கள் உள்ளனர். அ.தி.மு.க.வின் முடிவு தொடர்பாக தேசிய தலைமை பேசும். இவ்வாறு அவர் கூறினார்.