மிசஸ் & மிஸ்டர் திரை விமர்சனம்

வனிதா விஜயகுமாரும், ராபர்ட்டும் காதல் திருமணம் செய்து கொண்டு பாங்காக்கில் மகிழ்ச்சியாக வாழ்கிறார்கள்.  40 வயதை எட்டும் வனிதா குழந்தை பெற்றுக்கொள்ள ஆசைப்படுகிறார். ஆனால், ராபர்ட் குழந்தை வேண்டாம் என்று சொல்கிறார். இதனால் இருவரும் அடிக்கடி சண்டை போட்டுக் கொண்டாலும், கர்ப்பமாவதற்கான அனைத்து முயற்சிகளிலும் வனிதா ஈடுபட்டு வருகிறார். அதன்படி வனிதா கர்ப்பமாகி விட, ராபர்ட்டுக்கு தெரிந்தால் குழந்தை பெற்றுக்கொள்ள தடையாக இருப்பார் என்று நினைத்து அவருக்கு தெரியாமல் பாங்காக்கில் இருந்து இந்தியா வந்து விடுகிறார். வனிதாவின் பிரிவை தாங்க முடியாமல் தவிக்கும் ராபர்ட், வனிதாவை தேடி இந்தியா வருகிறார். வனிதா ஆசைப்பட்டது போல் குழந்தை பெற்றுக் கொண்டாரா?, அவரது கணவர் ராபர்ட் குழந்தை வேண்டாம் என்று சொல்வதற்கான காரணம் என்ன? என்பதே படத்தின் மீதிக்கதை. நாயகியாக நடித்திருக்கும் வனிதா விஜயகுமார், 40 வயது பெண்மணி கதாபாத்திரத்தில் கச்சிதமாக நடித்திருக்கிறார். நடன இயக்குநர் ராபர்ட், வனிதாவை காப்பாற்ற போராடும் காட்சிகளில் நேர்த்தியாக நடித்திருக்கிறார். வனிதாவின் அம்மாவாக நடித்திருக்கும் ஷகிலா, பவர் ஸ்டார் சீனிவாசன் ஆர்த்தி உள்ளிட்ட பலரும் படத்திற்கு எந்தவிதத்திலும் கைகொடுக்கவில்லை. ஸ்ரீகாந்த் தேவாவின் இசையில் பாடல்கள் ஆட்டம் போட வைக்கிறது. மூத்த நடிகர்கள் பட்டாளத்தை வைத்துக்கொண்டு நகைச்சுவை கமர்ஷியல் படத்தை கொடுத்திருந்தாலும், அதை ரசிக்கும்படியாக கொடுக்க தவறியிருக்கிறார் மிசஸ் வனிதா.