அண்ணா - எம்.ஜி.ஆர். நினைவிடங்களில் பராமரிப்புப் பணி

சென்னை, மே.8 - அண்ணா- எம்.ஜி.ஆர். நினைவிடங்கள் தனியார் மூலம் பராமரிக்கப்படும் என்றும், பார்வையாளர்களுக்கு குடிநீர் வசதி போன்றவை வழங்கப்படும் என்றும் செய்தித்துறை அமைச்சர் கே.டி.ராஜேந்திரபாலாஜி கூறினார்.

செய்தித்துறை மானியக்கோரிக்கை மீது அவர் பதிலளித்து பேசியதாவது:-

தனியார் பராமரிப்பில் பேரறிஞர் அண்ணா, எம்.ஜி.ஆர். நினைவிடங்கள் பராமரித்தல்:

முதலமைச்சர் ஜெயலலிதாவின் ஆணையின்படி, பேரறிஞர் அண்ணா மற்றும் எம்.ஜி.ஆர். நினைவிடங்களின் பாதுகாப்பு மற்றும் பராமரிப்பைக் கருத்தில் கொண்டு, தோட்டப்பணி, தூய்மைப்பணி மற்றும் இதர பணிகள் தனியார் நிறுவனம் மூலம் ரூ.77 லட்சம் மதிப்பீட்டில் மேற்கொள்ளப்படும். 

குடிநீர் வசதி:

பேரறிஞர் அண்ணா மற்றும் எம்.ஜி.ஆர். நினைவிடங்களுக்கு வருகை தரும் பார்வையாளர்களுக்கு சென்னை பெருநகர குடிநீர் வழங்கல் வாரியம் மூலம் ரூ.20 லட்சம் மதிப்பீட்டில் குடிநீர் வசதி ஏற்படுத்தப்படும். 

பாதுகாப்புப் பணி:

பேரறிஞர் அண்ணா மற்றும் எம்.ஜி.ஆர். நினைவிடங்களில் நாளுக்கு நாள் பார்வையாளர்களின் எண்ணிக்கை அதிகரித்து வருவதைக் கருத்தில் கொண்டு, தமிழ்நாடு காவல்துறை மூலம் பாதுகாப்புப் பணி மேற்கொள்ளப்படும். 

ராஜாஜி மண்டபம்:

வரலாற்று சிறப்புமிக்க சென்னை ராஜாஜி மண்டபம் ரூ.75 லட்சம் மதிப்பீட்டில் புதுப்பொலிவுடன் புதுப்பிக்கப்படும்.  

வைக்கம் பெரியார் நினைவகம்:

கேரள மாநிலம் வைக்கத்திலுள்ள தந்தை பெரியார் நினைவகத்தில் பார்வையாளர்கள் பயன்பெறும் வகையில் பார்வையாளர் மாடம், சிறுவர் பூங்கா ஆகியன ரூ.25 லட்சம் மதிப்பீட்டில் புதுப்பொலிவுடன் புனரமைக்கப்படும்.  

நவீன வெப் ஆப்செட்:

தமிழரசு அச்சகத்தில் வண்ணப் பிரதிகளை ஒரே நேரத்தில் அச்சிடவும், அச்சுத் தரத்தை உயர்த்தவும், சந்தாதாரர்களுக்கு விரைவாக இதழ்களை வழங்குவதற்கும், நான்கு வண்ண வெப் ஆப்செட் இயந்திரம் ரூ.6.50 கோடி மதிப்பீட்டில் கொள்முதல் செய்யப்படும்.  

இவ்வாறு அமைச்சர் கே.டி.ராஜேந்திரபாலாஜி கூறினார்.