பணியில் முறையாக செயல்படாத அதிகாரிகள் மாற்றம்

சென்னை, அக்.14 - உள்ளாட்சி தேர்தல் பணிகளை கண்காணிக்க மாநிலம் முழுவதும் தேர்தல் பார்வையாளர்கள் நியமிக்கப்பட்டுள்ளனர்.  அவர்கள் அளித்த அறிக்கையில், நாகப்பட்டினம் மாவட்டம் சீர்காழி போலீஸ் டி.எஸ்.பி.,  வேதாரண்யம் போலீஸ் டி.எஸ்.பி. ஆகியோர் நடுநிலையுடன் முறையாக பணிபுரியவில்லை. எனவே 2 போலீஸ் அதிகாரிகளையும் மாற்ற வேண்டும் என்று கூறப்பட்டிருந்தது. மாநில தேர்தல் ஆணையர் சோ அய்யர் அந்த அறிக்கையை பரிசீலனை செய்து சீர்காழி, வேதாரண்யம் போலீஸ் டி.எஸ்.பி.களை உடனே மாற்ற உத்தரவிட்டார். அதன்படி 2 பேரும் மாற்றப்பட்டு, அங்கு புதிய போலீஸ் அதிகாரிகள் நியமிக்கப்பட்டனர். 

தேர்தலுக்கு இன்னும் 3 நாட்களை உள்ளன. எனவே அனைத்து தேர்தல் நடவடிக்கைகளையும் தீவிரமாக கண்காணிக்கவும், முக்கிய நிகழ்ச்சிகளை வீடியோ பதிவு செய்யவும் உத்தரவிடப்பட்டுள்ளது. சட்டம்- ஒழுங்கை பாதுகாக்கவும் நடவடிக்கை எடுக்கப்பட்டுள்ளது. 

மேலும் தேர்தல் விதிமுறைகள் மீறப்பட்டுள்ளதா என்பதை கண்டறிந்து உடனடி நடவடிக்கை எடுக்க வேண்டும். வாக்குப்பதிவு அமைதியாக நடத்த அனைத்து ஏற்பாடுகளும் செய்ய வேண்டும் என்றும் தேர்தல் பார்வையாளர்களுக்கு மாநில தேர்தல் ஆணையர் சோ.அய்யர் உத்தரவிட்டுள்ளார்.