புதுடில்லி : பாராளுமன்ற சிறப்பு கூட்டத்தில் ஜி-20 உச்சி மாநாட்டை வெற்றிகரமாக நடத்தியதற்காக பிரதமர் மோடிக்கு லோக்சபா சபாநாயகர் மற்றும் ராஜ்யசபா தலைவர் ஆகியோர் பாராட்டு தெரிவித்தனர்.

நேற்று (செப்.,18) முதல் செப்.,22 வரை பார்லி., சிறப்பு கூட்டம் நடைபெறகிறது. முதல் நாளான நேற்று தேசிய கீதம் இசைக்கப்பட்ட அவை நடவடிக்கைகள் துவங்கின. அப்போது லோக்சபாவில் எதிர்க்கட்சிகள் அமளியில் ஈடுபட்டனர். அமைதியாக இருக்குமாறு சபாநாயகர் ஓம் பிர்லா வலியுறுத்தினார். பின்னர் ஓம் பிர்லா பேசியதாவது: இந்தியாவின் டிஜிட்டல் வளர்ச்சி வளர்ந்த நாடுகளுக்கு இணையாக உள்ளது. மேற்கத்திய நாடுகளுக்கும் மற்ற நாடுகளுக்குமான இணைப்பு பாலமாக இந்தியா விளங்குகிறது.

ஜி20 மாநாட்டை சிறப்பாகவும் வெற்றிகரமாகவும் நடத்தியதற்காக ஒவ்வொரு இந்தியரையும் பாராட்ட விரும்புகிறேன். இம்மாநாட்டை நாட்டு மக்களுக்கு அர்பணிக்கும் பிரதமர் மோடியின் தொலைநோக்கு பார்வைக்கும் பாராட்டுகள். ஜி20 மாநாடு மூலம் இந்தியாவின் புகழ் உலக அரங்கில் மேலும் உயர்ந்துள்ளது. மாற்றத்திற்கான முக்கிய முடிவுகள் ஜி20 உச்சி மாநாட்டில் எடுக்கப்பட்டன. ஜி20 மாநாட்டில் சுற்றுச்சூழல், காலநிலை மாற்றம் குறித்து முக்கிய முடிவுகளை எடுத்துள்ளோம். உலகளவில் அமைதியை நிலைநாட்டுவதில் இந்தியாவின் பங்களிப்பு முக்கியமாக உள்ளது. இவ்வாறு அவர் பேசினார்.

ராஜ்யசபாவிலும், அவைத் தலைவரும், துணை ஜனாதிபதியுமான ஜெகதீப் தன்கர் ஜி20 உச்சி மாநாட்டை வெற்றிகரமாக நடத்தியதற்காக பிரதமர் மோடிக்கு பாராட்டு தெரிவித்தார்.