அ.தி.மு.க. - பா.ஜ.க. இடையே பிரச்சினை ஏதும் இல்லை கோவையில் அண்ணாமலை பேட்டி

கோவை:அ.தி.மு.க. - பா.ஜ.க. இடையே பிரச்சினை இருப்பதாக தெரியவில்லை என்றும், யாரையும் நான் தவறாக  பேசவில்லை என்றும் தமிழக பா.ஜ.க. தலைவர் அண்ணாமலை தெரிவித்தார். 

கோவை விமான நிலையத்தில் தமிழக பா.ஜ.க. தலைவர் அண்ணாமலை செய்தியாளர்களை சந்தித்தார். அப்போது அவர் கூறியதாவது, 

மகளிர் இடஒதுக்கீடு மசோதா மக்களவையில் நிறைவேற்றியிருப்பது மகிழ்ச்சி அளிக்கிறது. பா.ஜ.க. ஆட்சியில் பெண்களுக்கு 33 சதவீத இடஒதுக்கீடு கொடுக்கப்பட்டுள்ளது. தொகுதி மறுவரையறை முடிந்த பிறகு மகளிர் இடஒதுக்கீடு நடைமுறைக்கு வரும். 50 ஆண்டுகளாக தொகுதி மறுவரையறை செய்யப்பட்டவில்லை.  

அ.தி.மு.க. - பா.ஜ.க. இடையே பிரச்சினை இருப்பதாக தெரியவில்லை. அ.தி.மு.க. தலைவர்கள் மற்றும் அண்ணாமலை இடையே பிரச்சினை இருப்பதாக நினைக்கிறேன். மோடி பிரதமராக வேண்டும் என்பதை அ.தி.மு.க. தலைவர்கள் ஏற்றுக் கொண்டுள்ளனர். பிரதமர் மோடியை ஆதரிப்பவர்களை நானும் ஆதரிப்பேன். இதில் மாற்றுக் கருத்தே இல்லை.  

எனது அரசியலில் நான் தெளிவாக இருக்கிறேன். தன்மானமே எனக்கு முக்கியம். எனக்கு யாருடனும் பிரச்சினை இல்லை. யாரையும் நான் தவறாக பேசவில்லை. கூட்டணி தொடர்பாக அ.தி.மு.க. பேசிய கருத்துக்கு நான் பதிலளிக்க முடியாது. 

அண்ணா பற்றி நான் பேசிய கருத்து சரியானது தான். அதற்காக மன்னிப்பு கேட்க மாட்டேன். நான் பேசியதில் தவறே இல்லை. வரலாறு ரீதியாக நடந்த விஷயத்தை பேசினேன். அண்ணா குறித்த செய்திக்கு மறுப்பு தெரிவித்த தனியார் செய்தி குழுமம் கூறியதை நான் ஏற்க மாட்டேன். அண்ணா குறித்து வந்த செய்திகள், வரலாறுகளை நான் வெளியிடத் தயாராக இருக்கிறேன். இவ்வாறு அவர் கூறினார்.