சென்னை, சென்னை தலைமை செயலகத்தில் நேற்று நடந்த நிகழ்வில் முதல்வர் மு.க. ஸ்டாலின், 37 மாவட்டங்களில் கட்டப்பட்ட 1000 புதிய வகுப்பறைகளை காணொலி மூலம் திறந்து வைத்தார்.  

தமிழகத்தில் உள்ள ஊராட்சி ஒன்றிய தொடக்கப் பள்ளிகள் மற்றும் நடுநிலைப் பள்ளிகளில், குழந்தை நேய பள்ளி உட்கட்டமைப்பு மேம்பாட்டுத் திட்டத்தின் கீழ் ரூ.150 கோடி செலவில் புதிய வகுப்பறைகள் கட்டப்பட்டு வந்தது. இதில் 37 மாவட்டங்களில் கட்டப்பட்ட 1000 புதிய வகுப்பறைகள் நேற்று திறந்து வைக்கப்பட்டது. முதல்வர்  மு.க.ஸ்டாலின் தலைமைச் செயலகத்தில் இருந்தபடி காணொலி வாயிலாக இந்த புதிய வகுப்பறைகளை திறந்து வைத்தார். 

ஊரக வளர்ச்சி மற்றும் ஊராட்சித் துறை சார்பில் நடைபெற்ற இந்த நிகழ்ச்சியில் அமைச்சர்கள் ஐ. பெரியசாமி, அன்பில் மகேஷ், தலைமைச் செயலாளர் சிவ்தாஸ் மீனா மற்றும் அதிகாரிகள் கலந்து கொண்டனர். இந்த நிகழ்ச்சியில் கிராம ஊராட்சிக்கு பொதுமக்கள் வரி, கட்டணங்கள் செலுத்துவதற்கான புதிய இணைய தளத்தையும் முதல்வர்  மு.க.ஸ்டாலின் தொடங்கி வைத்தார். மேலும் தமிழ்நாடு எளிமைபடுத்தப்பட்ட ஊராட்சி கணக்குகள் திட்டத்திற்கான இணையதளத்தையும் அவர் தொடங்கி வைத்தார்.