7 மாதங்களில் மட்டும் அயோத்தி ராமர் கோவிலில் 183 கோடி ரூபாய் காணிக்கை

புதுடெல்லி, அயோத்தி ராமர் கோவிலில் ஏழு மாதங்களில் ரூ.183 கோடி அளவில் காணிக்கைகள் பெறப்பட்டுள்ளன. இதில் வெள்ளி, தங்கம் மற்றும் ரொக்கம் அடங்கும்.

உத்தரப்பிரதேசம் அயோத்தியில் உச்ச நீதிமன்ற உத்தரவின்படி ஸ்ரீராமஜென்மபூமி தீர்த்தஷேத்ரா எனும் அறக்கட்டளை அமைத்து ராமர் கோவில் கட்டப்பட்டுள்ளது. இந்த அறக்கட்டளை அமைந்தது முதல் கோவில் கட்டுவதற்காக பக்தர்கள் காணிக்கை குவியத் தொடங்கியது.

2024வது வருடம்  ஏப்ரல் முதல் அக்டோபர் வரையிலான ஏழு மாதங்களில்  மொத்தம் ரூ.183 கோடி மதிப்பிலான காணிக்கை பெறப்பட்டுள்ளது.  இத்துடன் கோவில் உண்டியல் உள்ளிட்ட வேறுபல வகைகளில் காணிக்கையாக ரூ.10 கோடி பெறப்பட்டுள்ளது.  இவை அன்றி வெள்ளியில் காணிக்கையான 94 கிலோ எடையில் கிடைத்துள்ளது.  

ராமர் கோவிலுக்கான அறக்கட்டளை அமைந்தது முதல் அதன் சொத்துக்களும் விரிவாக்கப்படுகின்றன. இந்தவகையில், சுமார் 37 ஏக்கர் நிலங்களை ரூ.328 கோடி விலையில் வாங்கப்பட்டுள்ளன. இந்த நிலங்களில் பக்தர்கள் வசதிக்காக கட்டிடங்கள் கட்டப்பட உள்ளன. இதன்மூலம், அயோத்யாவின் ராமர் கோவிலுக்கு பக்தர்கள் சிரமமின்றி வந்துசெல்ல இயலும்.