அ.தி.மு.க. - பா.ஜ.க. கூட்டணி மீண்டும் இணைந்தால் மகிழ்ச்சி நயினார் நாகேந்திரன் எம்.எல்.ஏ. பேட்டி

நெல்லை, அ.தி.மு.க. - பா.ஜ.க. இடையே இணக்கம் ஏற்பட்டு கூட்டணி மீண்டும் இணைந்தால் மகிழ்ச்சிதான் என்று பா.ஜ.க. எம்.எல்.ஏ. நயினார் நாகேந்திரன் தெரிவித்தார். 

நெல்லை பா.ஜ.க. எம்.எல்.ஏ நயினார் நாகேந்திரன் செய்தியாளர்களை சந்தித்தார். அப்போது அவர் கூறியதாவது:-

அ.தி.மு.க. - பா.ஜ.க. இடையே இணக்கம் ஏற்பட்டு கூட்டணி மீண்டும் இணைந்தால் மகிழ்ச்சிதான். அ.தி.மு.க.வில் பெரும் பதவியில் இருந்து விட்டு பா.ஜ.க.வில் இணைந்தேன். எனக்கு கட்சி பதவி முக்கியம் இல்லை. 

எம்.எல்.ஏ. பதவியை துறந்து விட்டு பா.ஜ.க.வில் இணைந்த விஜயதரணிக்கு நிச்சயம் பதவி கிடைக்கும். தமிழகத்தில் சட்டம், ஒழுங்கு சரியில்லை. தமிழகம் முழுவதும் கஞ்சா உள்ளிட்ட போதைப்பொருட்கள் புழக்கம் அதிகரித்துள்ளன. தினமும் கொலை, கொள்ளை, கற்பழிப்பு சம்பவங்கள் தமிழகத்தில் நடைபெறுகின்றன. 

முதல்வர் ஸ்டாலின் வெளிநாட்டில் இருந்தாலும் தமிழகத்தில் என்ன நடக்கின்றன என்பதை தெரிந்து கொள்ள வேண்டும். நடிகர் விஜய்யை பார்த்து ஆளுங்கட்சி அஞ்சுகிறது. விஜய் மாநாட்டிற்கு அனுமதி வழங்கினால் எந்த பிரச்சினை இல்லை. 

தமிழகத்தில் எந்தவொரு கட்சி ஆரம்பித்தாலும் அதற்கு சுதந்திரம் உண்டு; கட்சி மாநாட்டிற்கு தமிழக அரசு கண்டிப்பாக அனுமதி அளிக்க வேண்டும். இவ்வாறு அவர் கூறினார்.