புதுடெல்லி : எந்தவொரு மாநிலத்தின் மீதும் மத்திய அரசு எந்த மொழியையும் திணிக்காது என மத்திய அமைச்சர் ரமேஷ் பொக்ரியால் தெரிவித்துள்ளார்.
2019-ம் ஆண்டு புதிய கல்விக் கொள்கை வரைவை இஸ்ரோ முன்னாள் தலைவர் கஸ்தூரி ரங்கன் தலைமையிலான குழு மத்திய அமைச்சரிடம் வழங்கியது. மத்திய அரசு புதிய கல்விக் கொள்கைக்கு ஒப்புதல் அளித்துள்ளது.
இந்நிலையில் தேசம் வெல்ல தேசிய கல்விக்கொள்கை என்ற பிரதமர் நரேந்திர மோடியின் உரையை முன்னாள் மத்திய இணை அமைச்சர் பொன்.ராதாகிருஷ்ணன் சுட்டுரையில் பகிர்ந்திருந்தார்.
அதனை மத்திய அமைச்சர் ரமேஷ் பொக்ரியால் சுட்டுரையில் மறுபதிவு செய்துள்ளார். அதில், தேசிய கல்விக் கொள்கை (NEP)-ஐ நடைமுறைப்படுத்துவதற்கான உங்கள் வழிகாட்டலை எதிர்பார்க்கிறோம்.
மத்திய அரசு, எந்தவொரு மாநிலத்தின் மீதும் எந்த மொழியையும் திணிக்காது என்பதை மீண்டும் வலியுறுத்த விரும்புகிறேன் என அவர் பதிவிட்டுள்ளார்.
