பாராட்டு மழையில் லப்பர் பந்து படக்குழு

பிரின்ஸ் பிக்சர்ஸ் லக்ஷ்மன் குமார் தயாரிப்பில் சமீபத்தில் வெளியான படம் லப்பர் பந்து. அறிமுக இயக்குநர் தமிழரசன் பச்சமுத்து இயக்கியுள்ள இந்த படத்தில் ஹரிஷ் கல்யாண், அட்டகத்தி தினேஷ், சுவாசிகா விஜய், சஞ்சனா கிருஷ்ணமூர்த்தி பால சரவணன், காளி வெங்கட் ஜென்சன் உள்ளிட்ட பலர் நடித்திருந்தனர்.

ஷான் ரோல்டன் இசையமைத்திருந்த இப்படத்தில்  கிராமத்து கிரிக்கெட்டுடன் காதலையும் கலந்து சொல்லியிருப்பதனால் ரசிகர்களிடம் ஏகோபித்த வரவேற்பை பெற்று இது ஒரு மிகப்பெரிய வெற்றிப்படமாக அமைந்தது. இந்த நிலையில் இந்த படத்தின் வெற்றிக்கு உறுதுணையாக இருந்த அனைவருக்கும் நன்றி தெரிவிக்கும் விதமாக இந்த படத்தின் வெற்றி விழா சமீபத்தில் நடைபெற்றது.

இதில் தயாரிப்பாளர் லக்ஷ்மன் குமார் பேசுகையில், இரண்டு ஹீரோக்கள் என்கிற கதையில் நடித்துக் கொடுத்த ஹரிஷ் கல்யாண், அட்டகத்தி தினேஷ் மற்றும் அனைத்து நட்சத்திரங்களுக்கும் நன்றி என்றார். பின்னர் பேசிய நாயகன் ஹரிஷ் கல்யாண், தியேட்டரில் சென்று ரசிகர்களை சந்தித்து நாங்கள் ரொம்பவே மகிழ்ச்சியாக இருக்கிறோம் என அவர்களிடம் சொன்னோம். ஆனால் அவர்களோ உங்களைவிட நாங்கள் இரட்டிப்பு மகிழ்ச்சியாக இந்த படத்தை பார்த்து ரசித்தோம் என்று கூறியது இன்னும் அதிக சந்தோஷத்தை தந்தது என்றார்.