அமித்ஷா மீதான குற்றச்சாட்டு: கனடா நாட்டு தூதர்களிடம் இந்தியா கடும் கண்டனம்

புதுடெல்லி : மத்திய உள்துறை அமைச்சர் அமித் ஷா மீதான குற்றச்சாட்டு அபத்தமானது என்று கனடா நாட்டு தூதர்களை அழைத்து இந்தியா கடும் கண்டனம் தெரிவித்துள்ளது.

கனடாவில் சீக்கிய பிரிவினைவாதிகளுக்கு எதிரான தாக்குதலின் பின்னணியில், மத்திய அரசும், மத்திய உள்துறை அமைச்சர் அமித் ஷாவும் இருப்பதாக கனடா அமைச்சர் கூறியிருந்தது அபத்தமானது மற்றும் அடிப்படையற்றது என இந்தியா கண்டனம் தெரிவித்துள்ளது.

கனடாவில் உள்ள சீக்கிய பிரிவினைவாதிகள் மீதான தாக்குதலுக்கு மத்திய உள்துறை அமைச்சர் அமித் ஷாதான் உத்தரவிட்டிருந்ததாக கனடா நாட்டு அமைச்சர் குற்றம்சாட்டியிருந்ததாக சர்வதேச ஆங்கில ஊடகம் செய்தி வெளியிட்டிருந்தது. ஆனால், இந்த குற்றச்சாட்டுகளை மறுத்திருக்கும் இந்தியா, புது தில்லியில் உள்ள கனடா நாட்டு தூதர்களை அழைத்து, தங்களது கண்டனத்தைத் தெரிவித்துள்ளது.

சீக்கிய பிரிவினைவாதிகளுக்கு எதிராக அமித் ஷா எடுக்கும் நடவடிக்கையால், நாட்டில் மக்களின் பாதுகாப்பு மற்றும் தேசிய பாதுகாப்பு கேள்விக்குறியாவதாக கனடா நாட்டு வெளியுறவு விவகாரத் துறை இணை அமைச்சர் டேவிட் மோரிசன், கனடா நாடாளுமன்ற நிலைக் குழு முன்பு தெரிவித்திருந்தார்.

இதற்கு எதிர்வினையாற்றியிருக்கும் இந்திய வெளியுறவுத் துறை அமைச்சக செய்தித் தொடர்பாள ரந்தீர் ஜெய்ஸ்வால், கனடா அமைச்சரின் பேச்சுக்கு இந்தியா சார்பில் கடும் கண்டனம் தெரிவிக்கப்பட்டுள்ளது. கனடா நாட்டு தூதர்கள், வெளியுறவுத்துறை அமைச்சகத்துக்கு வரவழைக்கப்பட்டு, அவர்களிடம் கண்டனம் தெரிவிக்கப்பட்டதாகவும் கூறியிருக்கிறார்.