சோனியா காந்தி - கருணாநிதி சந்திப்பு

புது டெல்லி, அக். 23 - காங்கிரஸ் தலைவர் சோனியா காந்தியை நேற்று காலை டெல்லியில் தி.மு.க. தலைவர் கருணாநிதி சந்தித்தார். சோனியா காந்திக்கு உடல்நலக் குறைவு ஏற்பட்டு அமெரிக்காவில் தங்கியிருந்து சிகிச்சை பெற்று குணமடைந்து சமீபத்தில் டெல்லி திரும்பினார். இந்நிலையில் நேற்று முன்தினம் சென்னையில் இருந்து டெல்லி சென்ற கருணாநிதி, நேற்று காலை 11 மணிக்கு டெல்லியில் உள்ள சோனியா காந்தியின் வீட்டிற்கு கருணாநிதி சென்றார். 

அவரை சோனியா காந்தி வரவேற்றார். சுமார் 40 நிமிடங்கள் இருவரும் பேசினர். அப்போது சோனியாவிடம் கருணாநிதி உடல்நலம் குறித்து விசாரித்தார். பின்னர் அவர் தங்கியிருந்த ஓட்டலுக்கு புறப்பட்டு சென்றார். சோனியா காந்தியை சந்தித்த போது கருணாநிதியுடன் அவரது துணைவியார் ராஜாத்தி அம்மாள், டி.ஆர். பாலு ஆகியோர் உடனிருந்தனர். நேற்று மாலை 4 மணியளவில் திகார் சிறைக்கு சென்ற கருணாநிதி மகள் கனிமொழியை சந்தித்தார். அதைத் தொடர்ந்து கருணாநிதி பிரதமர் மன்மோகன்சிங்கையும் சந்தித்து பேசினாராம்.