நிக்கி ஹாலேவுக்கு அரசில் இடமில்லை: டிரம்ப் உறுதி

வாஷிங்டன் :  அமெரிக்காவில் அடுத்து அமையும் அரசில் இடம்பெற, ஐ.நா. விற்கான முன்னாள் தூதர் நிக்கி ஹாலே மற்றும் முன்னாள் வெளியுறவு அமைச்சர் மைக் பாம்பியோவை அழைக்கவில்லை என அதிபராக தேர்வாகி உள்ள டிரம்ப் கூறியுள்ளார்.

அமெரிக்க அதிபர் தேர்தலில் குடியரசு கட்சி சார்பில் களமிறங்கிய டொனால்ட் டிரம்ப் வெற்றி பெற்று மீண்டும் அதிபராக பதவியேற்க உள்ளார். இதற்காக அதிகார மாற்றத்திற்கான பணிகள் நடந்து வருகின்றன. 

இதனிடையே, புதிய அரசில் யாருக்கு வாய்ப்பு அளிப்பது குறித்து, டிரம்ப் ஆலோசனை நடத்தி வருகிறார். நிக்கி ஹாலேவும், மைக் பாம்பியோவும் புதிய அரசில் இடம்பெறுவார்கள் என அந்நாட்டு ஊடகங்கள் செய்தி வெளியிட்டன.

இது தொடர்பாக டிரம்ப் வெளியிட்டுள்ள அறிக்கையில் கூறியிருப்பதாவது, 

எனது நிர்வாகத்தில் இடம்பெற வேண்டும் என நிக்கி ஹாலே மற்றும் மைக் பாம்பியோவை அழைக்க மாட்டேன். முந்தைய அரசில் அவர்களுடன் இணைந்து பணியாற்றியதை மறக்க முடியாது. நாட்டிற்காக அவர்கள் ஆற்றிய பணிக்கு நன்றி தெரிவித்துக் கொள்கிறேன். இவ்வாறு அந்த அறிக்கையில் டிரம்ப் கூறியுள்ளார்.