காரை வழிமறித்து தாக்குதல்: பா.ம.க. இருதரப்பினர் மீதும் வழக்குப்பதிவு

சேலம்: காரை வழிமறித்து தாக்குதலை தொடர்ந்து இருதரப்பினர் இடையே வழக்கு பதிவு செய்யப்பட்டுள்ளது.

சேலம் மாவட்டம் வாழப்பாடி அருகே வடுகத்தம்பட்டியை சேர்ந்தவர் சத்யராஜ். பா.ம.க. ஒன்றிய செயலாளரான இவரது தந்தை கடந்த 3 தினங்களுக்கு முன்பு  மரணம் அடைந்தார். இந்த துக்க வீட்டிற்கு அருள் எம்.எல்.ஏ. கட்சி நிர்வாகிகள் சிலருடன் நேற்றுமுன்தினம்  காரில் சென்றார். அங்கு துக்கம் விசாரித்து விட்டு அருள் எம்.எல்.ஏ. காரில் சேலம் நோக்கி புறப்பட்டார். அவருக்கு பின்னால் 3 கார்களில் எம்.எல்.ஏ. ஆதரவாளர்கள் வந்தனர். 

அப்போது வடுகத்தம்பட்டி பாலம் அருகே அருள் எம்.எல்.ஏ. வந்த காரை ஒரு கும்பல் வழிமறித்து திடீரென கார் கண்ணாடியை அடித்து நொறுக்கினர். பின்னர், காரில் இருந்த எம்.எல்.ஏ. விடம் வாக்குவாதத்தில் ஈடுபட்டதாக தெரிகிறது. இதை சற்றும் எதிர்பாராத எம்.எல்.ஏ.வுடன் வந்த நிர்வாகிகள் பின்னால் வந்த கார்களில் இருந்து இறங்கி தட்டிக்கேட்டனர். இதில் அந்த கும்பலுக்கும், இவர்களுக்கும் கடும் வாக்குவாதம் ஏற்பட்டு, ஒரு கட்டத்தில் கைக்கலப்பாக மாறியது. ஒருவரையொருவர் கட்டை மற்றும் கற்களை வீசி தாக்கி கொண்டனர். இதனால் அங்கு பெரும் பரபரப்பு ஏற்பட்டது.

அப்போது, மாநகர் மாவட்ட இளைஞர் அணி செயலாளர் விஜயகுமாருக்கு கையில் கத்தி வெட்டு விழுந்தது. இதேபோல் 10 நிர்வாகிகளுக்கு காயம் ஏற்பட்டது. இதை அறிந்த போலீசார் சம்பவ இடத்திற்கு விரைந்து இருதரப்பினரையும் சமாதானப்படுத்தி கூட்டத்தை கலைத்தனர். இதற்கிடையே காயமடைந்த எம்.எல்.ஏ. ஆதரவாளர்கள் 11 பேர் சிகிச்சைக்காக சேலம் அரசு மருத்துவமனையில் அனுமதிக்கப்பட்டனர். இந்நிலையில் காரை வழிமறித்து தாக்குதலை தொடர்ந்து இருதரப்பினர் இடையே வழக்கு பதிவு செய்யப்பட்டுள்ளது.