ஒபாமாவைவிட ஆஸ்திரேலிய பிரதமருக்கு சம்பளம் அதிகம்

மெல்போர்ன், டிச.2 - அமெரிக்க அதிபர் பாரக் ஒபாமாவைவிட ஆஸ்திரேலிய பிரதமர் ஜுலியா கில்லார்டுக்கு சம்பளம் அதிகமாக இருக்கிறது. ஆஸ்திரேலிய எம்.பி.க்களின் சம்பளத்தை உயர்த்த முடிவு செய்யப்பட்டுள்ளது. அதன்படி ஆஸ்திரேலிய பிரதமர் ஜுலியா கில்லார்டின் சம்பளம் விரைவில் 90,000 அமெரிக்க டாலர்கள் அதாவது 47,02,968 அதிகமாக இருக்கிறது. அவர் தற்போது வாங்கும் சம்பளத்துடன் இந்த கூடுதல் தொகையும் சேர்க்கப்பட்டால் அது அமெரிக்க அதிபர் ஒபாமா மற்றும் இங்கிலாந்து பிரதமர் டேவிட் கேமரூன் ஆகியோர் வாங்கும் சம்பளத்தைவிட அதிகமாகிவிடும். 

ஆஸ்திரேலியாவில் பல ஆண்டுகளாக எம்.பி.க்களுக்கு சம்பளம் உயர்த்தப்படாமலே இருந்துவந்தது. இதனால் எம்.பி.க்களின் சம்பளத்தை உயர்த்த முடிவு செய்யப்பட்டுள்ளது. அதன்படி குறைந்த அனுபவம் வாய்ந்த எம்.பி.க்களின் சம்பளம்கூட ரூ.73,15,728 ல் இருந்து 94,05,936 ஆக உயர்த்தப்படும் என்று கூறப்படுகிறது. எம்.பி.க்களின் சம்பளம் இதைவிட அதிகமாகவும் உயர்த்தப்படலாம் என்றும் கூறப்படுகிறது. இதன்படி ஆஸ்திரேலிய பிரதமர் ஜுலியா கில்லார்டுவுக்கு 160 சதவீத சம்பள உயர்வு கொடுக்கப்படவிருக்கிறது. அதன்படி அவரது புதிய சம்பளம் ரூ. 2,45,59,944 ஆகும். அப்படி உயரும் பட்சத்தில் அது அமெரிக்க அதிபர் ஒபாமாவின் சம்பளமான 2,09,02,080 மற்றும் இங்கிலாந்து பிரதமர் டேவிட் காமரூனின் சம்பளமான 1,15,48,399 ஆகியவற்றை விட அதிகமாகிவிடும்.  

ஆஸ்திரேலிய பட்ஜெட்டில் பொதுமக்களுக்கான சலுகைகள் குறைக்கப்பட்டுள்ள நிலையில் எம்.பி.க்களுக்கு சம்பளம் உயர்த்தப்படுமாயின் அது மக்களிடையே பெரும் அதிருப்தியை ஏற்படுத்தும்.