புதிய முதல்வராக பதவியேற்கும் மு.க.ஸ்டாலினுக்கு மதுரை ஆதீனம் வாழ்த்து

மதுரை : புதிய முதல்வராக பதவியேற்கவிருக்கும் மு.க.ஸ்டாலினுக்கும் அவரது கட்சிக்கும் மதுரை ஆதீனம் வாழ்த்து தெரிவித்துள்ளார்.

நடந்து முடிந்த சட்டசபை தேர்தலில் தி.மு.க.தனிமெஜாரிட்டியுடன் வெற்றிபெற்றுள்ளது. இதையடுத்து வரும் 7 - ம் தேதி புதிய முதல்வராக மு.க.ஸ்டாலின் பதவியேற்க இருக்கிறார். இது கொரோனா காலம் என்பதால் கவர்னர் மாளிகையில் எளிமையாக விழா நடைபெற உள்ளது. இந்நிலையில் மு.க.ஸ்டாலினுக்கு வாழ்த்துக்கள் குவிந்து வருகிறது.

மதுரை ஆதீனம் ஸ்ரீலஸ்ரீ அருணகிரி நாத ஞானசம்பந்த தேசிக பராமாச்சாரிய சுவாமிகள் விடுத்துள்ள வாழ்த்து செய்தி வருமாறு:-

தி.மு.க.நடந்து முடிந்த சட்டசபை தேர்தலில் மாபெரும் வெற்றி பெற்றுள்ளது. முதலமைச்சராக பதவியேற்க இருக்கும் மு.க.ஸ்டாலின் அவர்களுக்கு நமது பாராட்டுகளையும், வாழ்த்துக்களையும் தெரிவித்து கொள்கிறோம். அமையவிருக்கும் புதிய அமைச்சரவையில் பங்கேற்கும் அமைச்சர் பெருமக்களுக்கும், சட்டமன்ற உறுப்பினர்களுக்கும் எமது வாழ்த்துக்களை தெரிவித்து கொள்கிறோம். சிறப்பான வகையில் தி.மு.க.ஆட்சி நடக்கட்டும். எல்லோருக்கும் எனது ஆசிர்வாதம். இவ்வாறு அவர் கூறியுள்ளார்.

பா.ஜ.க. எம்.எல்.ஏ.க்களுக்கு வாழ்த்து

நாகர்கோவிலில் வெற்றிபெற்றுள்ள பா.ஜ.க.வேட்பாளர் எம்.ஆர்.காந்தி, திருநெல்வேலியில் வெற்றிபெற்றுள்ள நயினார் நாகேந்திரன், கோவை தெற்கில் கமலஹாசனை வீழ்த்தி வெற்றி பெற்ற வானதிஸ்ரீனிவாசன் மற்றும் முடக்குறிச்சி சி.கே.சரஸ்வதி ஆகிய நான்கு புதிய பா.ஜ.க.எம்.எல்.ஏ.க்களுக்கும் மதுரை ஆதீனம் தனது வாழ்த்துக்களை தெரிவித்துள்ளார்.