பொறியியல் படிப்புகளுக்கான தரவரிசை பட்டியல் வரும் 20-ம் தேதி வெளியாகும் - அமைச்சர் கே.பி. அன்பழகன் அறிவிப்பு

சென்னை : பொறியியல் படிப்புகளுக்கான தரவரிசைப் பட்டியல் வரும் 20-ம் தேதி வெளியாகும் என்று உயர்கல்வித் துறை அமைச்சர் கே.பி.அன்பழகன் தெரிவித்துள்ளார்.

இந்த ஆண்டு பொறியியல் படிப்புகளில் சேருவதற்கு ஒரு லட்சத்து 13 ஆயிரம் பேர் விண்ணப்பித்து இருந்தனர். அவர்களது சான்றிதழ்களை சரிபார்க்கும் பணி கடந்த 13-ம் தேதி வரை நடைபெற்றது. இன்று தரவரிசைப் பட்டியல் வெளியிடப்படும் என்று ஏற்கெனவே அறிவிக்கப்பட்டு இருந்து. இந்த  நிலையில் தரவரிசைப் பட்டியல் வெளியீடு வரும் 20-ம் தேதிக்கு மாற்றப்பட்டுள்ளது. சான்றிதழ் சரிபார்ப்புக்கு வராமல் இருந்தவர்கள், சரியான சான்றிதழ்களை கொடுக்கத் தவறியவர்கள் ஆகியோர் இந்த தேதி மாற்றத்தைப் பயன்படுத்திக் கொள்ளுமாறு அறிவுறுத்தப்பட்டுள்ளனர்.

வரும் 20-ம் தேதி அன்று பொறியியல் படிப்புகளில் சேரும் சிறப்புப் பிரிவினருக்கான கலந்தாய்வு நடைபெறுவதாக இருந்தது. ஆனால் தரவரிசைப் பட்டியல் அன்றைய தினம் வெளியாவதால், கலந்தாய்வு தேதி மாற்றப்பட உள்ளதாக கூறப்படுகிறது.