விஜயவாடா : ஆந்திர பிரதேசத்தில் 5 வயதுக்கு உட்பட்ட குழந்தைகளின் தாய்மார்களில் 5.5 லட்சம் பேருக்கு கொரோனா தடுப்பூசி போடப்பட்டு உள்ளது.
நாட்டில் கொரோனாவின் 2-வது அலையில் சிக்கி மக்கள் அவதியுற்ற சூழலில், 3-வது அலை பாதிப்பு ஏற்பட கூடிய சாத்தியமுள்ளது என நிபுணர்கள் எச்சரிக்கை விடுத்துள்ளனர். இதனால், பொதுமக்கள் கொரோனா விதிகளை முறையாக பின்பற்ற கேட்டு கொள்ளப்பட்டு உள்ளனர்.
இதேபோன்று நாட்டில், கொரோனா தடுப்பூசி போடும் பணிகளும் தீவிரப்படுத்தப்பட்டு உள்ளன. இந்நிலையில், ஆந்திர பிரதேசத்தில் 5 வயதுக்கு உட்பட்ட குழந்தைகளின் தாய்மார்களுக்கு கொரோனா தடுப்பூசி போடப்பட்டு வருகிறது. இதுபற்றி பொது சுகாதாரம் மற்றும் குடும்பநல இயக்குனரான மருத்துவர் கீதா பிரசாதினி கூறும் போது,
இந்தியாவில் கொரோனா 3-வது அலை பாதிப்பு ஏற்பட கூடிய சாத்தியம் உள்ளது. அதனை முன்னிட்டு தாய்மார்களுக்கு கொரோனா தடுப்பூசி செலுத்தும் பணியை மேற்கொண்டுள்ளோம். நேற்று முன்தினம் வரை 5.5 லட்சம் தாய்மார்களுக்கு தடுப்பூசி போடப்பட்டு உள்ளது. இதுதவிர, மீதமுள்ள 4.5 முதல் 5 லட்சம் தாய்மார்களுக்கு தடுப்பூசி போடும் பணியை இலக்காக கொண்டு செயல்பட்டு வருகிறோம் என கூறினார்.
