சென்னையில் உள்ள 3 தொகுதி நிர்வாகிகளுடன் எடப்பாடி பழனிசாமி இன்று ஆலோசனை

சென்னை : நடந்து பாராளுமன்ற தேர்தல் முடிவுகள் குறித்து சென்னையில் உள்ள 3 தொகுதி நிர்வாகிகளுடன் அ.தி.மு.க. பொது செயலாளர் எடப்பாடி பழனிசாமி  இன்று ஆலோசனை நடத்துகிறார். 

நடந்து முடிந்த பாராளுமன்ற தேர்தல் முடிவுகள்  தொகுதி வாரியாக நிர்வாகிகளை கட்சியின் பொதுச்செயலாளர் எடப்பாடி பழனிசாமி சந்தித்து கருத்துக்களை கேட்டறிந்து வருகிறார். கடந்த 10-ம் தேதி தொடங்கிய ஆலோசனை கூட்டம் 2 கட்டமாக நடந்து வருகிறது. 

சென்னை ராயப்பேட்டையில் உள்ள கட்சி அலுவலகத்தில் பாராளுமன்ற தொகுதி வாரியாக அழைக்கப்பட்டு பேசி வருகிறார். அப்போது நிர்வாகிகள் பல்வேறு கருத்துக்களை அங்கு பதிவு செய்து வருகின்றனர். 

இந்த நிலையில் நேற்று காலையில் கள்ளக்குறிச்சி தொகுதி நிர்வாகிகளுடனும், மாலையில் சேலம் தொகுதி நிர்வாகிகளுடனும் எடப்பாடி பழனிசாமி ஆலோசனை நடத்தினார்.  அதை தொடர்ந்து இன்று (1-ம் தேதி) சென்னையில் உள்ள 3 பாராளுமன்ற தொகுதி நிர்வாகிகளை எடப்பாடி பழனிசாமி சந்திக்கிறார். 

காலையில் 9 மணிக்கு வடசென்னை தொகுதி, 11 மணிக்கு மத்திய சென்னை, மதியம் 3.30 மணிக்கு தென் சென்னை தொகுதி நிர்வாகிகளுடன் ஆலோசனை நடத்துகிறார். 3 தொகுதிகளுக்கும் உட்பட்ட மாவட்ட செயலாளர்கள், தேர்தலில் போட்டியிட்ட வேட்பாளர்கள், முன்னாள் எம்.பி., எம்.எல்.ஏ.க்கள் கலந்து கொள்கிறார்கள். 

இன்றைய தினத்தை தொடர்ந்து 3 நாட்கள் இடைவெளி விட்டு 5-ம் தேதி நடக்கும் கூட்டத்துடன் நிறைவு பெறுகிறது. அப்போது கரூர் மற்றும் புதுச்சேரி தொகுதி நிர்வாகிகளை சந்தித்து பேச உள்ளார்.