இந்திய ராணுவத்திற்கு புதிய தளபதியாக பிக்ரம்சிங் நியமனம்

புது டெல்லி, மார்ச். - 5 - இந்திய ராணுவத்துக்கு புதிய தலைமை தளபதியாக லெப்டினன்ட் ஜெனரல் பிக்ரம்சிங் நியமிக்கப்பட்டுள்ளதாக மத்திய அரசு அறிவித்துள்ளது.  வி.கே. சிங்கின் பதவிக் காலம் மே மாதம் 31 ம் தேதியுடன் முடிவடைகிறது. ஆனால் தனது பிறந்த தேதி மே 10, 1951  என்றும் மேலும் ஓராண்டு பதவியில் நீடிக்க தகுதியுள்ளது என்றும் சுப்ரீம் கோர்ட்டில் மத்திய அரசை எதிர்த்து அவர் வழக்கு தொடர்ந்தார். ஆனால் நீதிமன்றம் அவரது பதவி நீட்டிப்பு வழக்கை ரத்து செய்து உத்தரவிட்டது. தற்போது புதிய ராணுவ தலைமை தளபதியாக கிழக்கு பிராந்திய ராணுவ தலைமை தளபதி லெப்டினன்ட் ஜெனரல் பிக்ரம்சிங் பதவியேற்பார் என்று ராணுவ அமைச்சக செய்தி தொடர்பாளர் தெரிவித்துள்ளார்.  பிக்ரம்சிங்கிற்கு வயது 59. தற்போதைய தலைமை தளபதி வி.கே.சிங், வருகிற மே 10 ம் தேதி ஓய்வு பெற்றதும் புதிய தலைமை தளபதியாக பிக்ரம்சிங் பதவியேற்பார். 2014 ம் ஆண்டு ஆகஸ்ட் மாதம் வரை அவர் தலைமை பதவியில் இருப்பார் என்று ராணுவ தலைமை அமைச்சக அதிகாரி தெரிவித்தார். புதிய தலைமை தளபதி நியமனம் 60 நாட்களுக்கு முன்னர்தான் வழக்கமாக அறிவிக்கப்படும். ஆனால் பிக்ரம் சிங் விஷயத்தில் 90 நாட்களுக்கு முன்னதாக அறிவிக்கப்பட்டுள்ளது குறிப்பிடத்தக்கது.