தடைக்காலம் எதிரொலி: மீன்கள் விலை கடும் உயர்வு

கோவை : மீன்பிடி தடைக்காலம் என்பதால் கோவை உக்கடம் மீன் மார்க்கெட்டில் மீன்கள் விலை உயர்ந்துள்ளது. வஞ்சிரம் கிலோ ரூ.1,200க்கு விற்பனை செய்யப்பட்டது. 

கோவை உக்கடம் லாரிப்பேட்டை பகுதியில் உள்ள மொத்த மீன் மார்க்கெட்டுக்கு தூத்துக்குடி, ராமேஸ்வரம், நாகப்பட்டினம் உள்ளிட்ட மாவட்டங்களில் இருந்தும் கேரளா, கர்நாடகா மாநிலங்களில் இருந்தும் மீன்கள் வருகிறது. தமிழகத்தில் மீன்பிடி தடைக்காலம் அமலில் உள்ளது.

இதனால் தமிழக கடலோர மாவட்டங்களில் இருந்து வரக்கூடிய மீன்களின் வரத்து குறைந்துள்ளது. இதனால் கோவை உக்கடம் லாரிப்பேட்டை மொத்த மீன் மார்க்கெட்டில் மீன்கள் விலை உயர்ந்துள்ளது. மார்க்கெட்டில் இன்று விற்பனையான மீன்கள் விலை நிலவரம் கிலோவில் வருமாறு: வஞ்சிரம் ரூ.1200, மத்தி ரூ.200, நெத்திலி ரூ.250, ஊழி ரூ.400, அயிலை ரூ.250, கிழங்கா ரூ.100, சங்கரா ரூ.300, கடல் இறால் ரூ.500, வளர்ப்பு இறால் ரூ.400, கட்லா, ரோகு, நெய்மீன் தலா ரூ.140க்கும் விற்பனை செய்யப்படுகிறது.