புதுடெல்லி : பெரும்பாலான கொரோனா தடுப்பு உபகரணங்கள், மருந்துக்கு ஜி.எஸ்.டி.வரியில் இருந்து விலக்கு அளிக்கப்பட்டுள்ளதாக மத்திய அரசு அறிவித்துள்ளது.
உள்நாட்டில் தயாரிக்கப்படும் கொரோனா தடுப்பூசிகளுக்கு 5 சதவீத ஜி.எஸ்.டி. விதிக்கப்படுகிறது. கொரோனா சிகிச்சைக்கு பயன்படுத்தப்படும் மருந்துகள், ஆக்சிஜன் செறிவூட்டிகள் ஆகியவற்றுக்கு 12 சதவீத ஜி.எஸ்.டி. விதிக்கப்படுகிறது. இதுபோன்ற மருந்துகள், மருத்துவ உபகரணங்களுக்கு ஜி.எஸ்.டி. வரியை குறைக்க வேண்டும் என்ற கோரிக்கை எழுந்தது.
ஆனால், கடந்த மாதம் 28-ம் தேதி நடந்த ஜி.எஸ்.டி. கவுன்சில் கூட்டத்தில், இது தொடர்பாக பா.ஜ.க. ஆளும் மாநிலங்களுக்கும், எதிர்க்கட்சிகள் ஆளும் மாநிலங்களுக்கும் இடையே கருத்து வேறுபாடு ஏற்பட்டது. இதனால், இதுகுறித்து ஆய்வு செய்து பரிந்துரைப்பதற்காக அமைச்சர்கள் குழு ஒன்றை ஜி.எஸ்.டி. கவுன்சில் அமைத்தது. அந்த அமைச்சர்கள் குழு, கடந்த 7-ம் தேதி தனது அறிக்கையை சமர்ப்பித்தது.
இந்நிலையில் இந்த பிரச்சினை தொடர்பாக முடிவு எடுப்பதற்காக, மத்திய நிதி அமைச்சர் நிர்மலா சீதாராமன் தலைமையில் 44-வது ஜி.எஸ்.டி. கவுன்சில் கூட்டம் நேற்று நடைபெற்றது இந்த கூட்டத்தில் மத்திய நிதித்துறை இணை அமைச்சர் அனுராக் தாகூர், தமிழக நிதியமைச்சர் பழனிவேல் தியாகராஜன் உட்பட மற்ற மாநில நிதி அமைச்சர்கள், மூத்த அதிகாரிகள் உள்ளிட்ட பலர் காணொலி மூலம் பங்கேற்றனர். அமைச்சர்கள் குழுவில் இடம்பெற்ற மாநில நிதி அமைச்சர்கள் பலர், வரி குறைப்புக்கு ஆதரவு தெரிவித்துள்ளது குறிப்பிடத்தக்கது.
தடுப்பூசிகள் மற்றும் பிற கொரோனா தொடர்பான பொருட்கள் மீதான வரி குறித்த பரிந்துரையை ஜி.எஸ்.டி. கவுன்சில் அனுமதித்துள்ளது.இந்த ஆண்டு செப்டம்பர் வரை நிவாரணம் வழங்கப்படும். தடுப்பூசிகளுக்கு 5 சதவீத ஜி.எஸ்.டி.யாக குறைப்பு , அதே நேரத்தில் ஆக்சிமீட்டர் 12 சதவீதம் முதல் 5 சதவீதம் ஜி.எஸ்.டி. விதிக்கப்படும். மேலும், ஆம்புலன்ஸ் மீதான ஜி.எஸ்.டி. விகிதங்கள் 28 சதவீதத்திலிருந்து 12 சதவீதமாகக் குறைக்கப்பட்டுள்ளன.
