குடிமகான் விமர்சனம்

தற்கால நொறுக்குத்தீனிகளின் ஆபத்துகளை உணர்த்தும் படம் இந்த குடிமகான். நாயகன் விஜய்சிவன் நொறுக்குத்தீனிகள் தின்றாலே போதையாகிவிடுவார். குடிக்காமலே குடிகாரன் என்று பெயர் வாங்கும் அவர் அதனால் சந்திக்கும் சிக்கல்களைச் சிரிக்கச் சிரிக்கச் சொல்லியிருக்கிறார் இயக்குனர் பிரகாஷ். விஜய்சிவனும் அதற்கேற்ப நடித்திருக்கிறார். சாதாரணமாகவும் போதை ஆசாமியாகவும் நடித்து பாராட்டைப் பெறுகிறார். சாந்தினி குடும்பத்தலைவி வேடத்தை சிறப்பாகச் செய்திருக்கிறார். சுரேஷ் சக்ரவர்த்தி, நமோநாராயணன் இருவரும் சிரிக்க வைக்கிறார்கள். ஒளிப்பதிவாளர் மெய்யேந்திரனுக்கும், இசையமைப்பாளர் தனுஜ்மேனனுக்கும் பாராட்டுக்கள். எழுதி இயக்கியிருக்கும் பிரகாஷ்.என், கதாநாயகனுக்குப் புதிய நோயைக் கண்டுபிடித்து அதை அவர் நினைத்த மாதிரியே மக்களுக்கும் கடத்தியிருக்கிறார்.அதோடு தற்கால நொறுக்குத்தீனிகளின் ஆபத்துகளையும் சுட்டியிருப்பது நன்று.