தி.மு.க. உறுப்பினர் சேர்க்கையின் போது பொதுமக்களிடம் ஓ.டி.பி. பெற தடை

மதுரை, தி.மு.க.வினர் நடத்தி வரும் 'ஓரணியில் தமிழ்நாடு' உறுப்பினர் சேர்க்கையின் போது பொதுமக்களிடம் ஓ.டி.பி. பெற தடை விதித்து உயர் நீதிமன்ற மதுரை அமர்வு உத்தரவு பிறப்பித்துள்ளது.

சிவகங்கை மாவட்டம் திருப்புவனத்தைச் சேர்ந்த ராஜ்குமார், உயர் நீதிமன்ற மதுரை அமர்வில் பொதுநல மனுவினைத் தாக்கல் செய்துள்ளார். அதில், "தமிழகத்தில் ஆளும் கட்சியான தி.மு.க., ‘ஓரணியில் தமிழ்நாடு’ என்ற பெயரில் உறுப்பினர் சேர்க்கை இயக்கம் நடத்தி வருகிறது. இதற்காக தி.மு.க.வினர் வீடு வீடாக செல்லும்  தி.மு.க.வினர் பொதுமக்களிடம் பல்வேறு ஆவணங்களை கேட்டு துன்புறுத்துகின்றனர் .  அதோடு அனைவரின் தனிப்பட்ட செல்போன் எண்களை கேட்டு பதிவு செய்து ஓ.டி.பி.  மூலம்  மக்களை தி.மு.க.வில் சேர வற்புறுத்தி வருகின்றனர்.  

எனவே, தி.மு.க.வினர் இந்த செயலை தடுத்து நிறுத்த வேண்டும்    என கூறியுள்ளார்.

இந்த மனு நீதிபதிகள் எஸ்.எம்.சுப்பிரமணியம், ஏ. டி.மரிய கிளாட் அமர்வு முன்பாக நேற்று விசாரணைக்கு வந்தது. மனுதாரர் தரப்பில் வழக்கறிஞர் கள் மகேந்திரன், கே. ஆர்.பாரதி கண்ணன் ஆகியோர் வாதிடுகையில் "ஆதார் எண் உள்ளிட்ட விபரங்கள் கேட்கப்படுகின்றன. அதனடிப்படையில் வரும் ஓ.டி.பி. எண்ணை கேட்கின்றனர். உறுப்புனர் ஆகவில்லை எனில் மகளிர் உரிமைத் தொகை போன்ற சலுகைகள் கிடைக்காது என மிரட்டுகின்றனர்" என தெரிவிக்கப்பட்டு, அது தொடர்பான வீடியோ சமர்ப்பிக்கப்பட்டது.

அதையடுத்து நீதிபதிகள், வாக்காளர்களின் தனிநபர் விபரங்கள் பாதுகாக்கப்படுவது அவசியம். ஆகவே ஓரணியில் தமிழ்நாடு என்னும் பெயரில் உறுப்பினர் சேர்க்கையின் போது ஓ.டி.பி. யை பெற இடைக்கால தடை விதிக்கப்படுகிறது. உறுப்பினர் சேர்க்கையை நடத்தலாம். ஆனால் ஓ டிபி விபரங்களை கேட்கக் கூடாது என குறிப்பிட்ட நீதிபதிகள், வழக்கில் இந்திய தேர்தல் ஆணையத்தை நீதிமன்றம் தாமாக முன்வந்து சேர்ப்பதாகவும், டிஜிட்டல் முறையில் தனிநபர் தகவல் எவ்வாறு பாதுகாக்கப்படுகிறது? என்பது குறித்தும் வழக்கு தொடர்பாகவும் மத்திய மாநில அரசுகள் பதில் மனு தாக்கல் செய்ய உத்தரவிட்டு வழக்கு 2 வாரத்திற்கு ஒத்திவைத்தனர்.