கொரோனா தடுப்பூசியின் முதல் டோஸ்: மன்மோகன் சிங், மாநில கவர்னர்கள், முதல்வர்கள் போட்டுக் கொண்டனர்

முன்னாள் பிரதமர் மன்மோகன் சிங் நேற்று கொரோனா தடுப்பூசி போட்டுக் கொண்டார். 

இந்தியாவில் கொரோனா  தடுப்பூசி போடும் பணி நாடு முழுவதும் கடந்த ஜனவரி 16-ம் தேதி முதல் நடந்து வருகிறது. இதில், முதல் கட்டமாக மருத்துவர்கள், செவிலியர்கள், சுகாதார பணியாளர்கள் உள்ளிட்ட 3  கோடி முன்களப்  பணியாளர்களுக்கு தடுப்பூசி அளிக்கப்பட்டு வருகிறது.  இதற்காக, ஆக்ஸ்போர்டு பல்கலை.யின் கோவிஷீல்டு  தடுப்பூசியும், இந்தியாவில் கண்டுபிடிக்கப்பட்ட பாரத் பயோடெக் நிறுவனத்தின் கோவோக்சின் தடுப்பூசியும்  பயன்படுத்தப்படுகிறது. இதையடுத்து நாடு முழுவதும் முதியவர்கள் மற்றும் 45 வயதுக்கு மேற்பட்ட இணை நோயுள்ளவர்களுக்கு கடந்த 1-ம் தேதி முதல் கொரோனா தடுப்பூசி போடும் பணி தொடங்கியது. இதன்படி, கடந்த 1-ம் தேதி முதல்நபராக டெல்லி எய்ம்ஸ் மருத்துவமனையில் பிரதமர் நரேந்திர மோடி கொரோனா தடுப்பூசியின் முதல் டோஸை போட்டுக் கொண்டார். 

இதனை தொடர்ந்து, இந்நிலையில் நேற்று 4-வது நாளில், டெல்லி எய்ம்ஸ் மருத்துவமனையில் முன்னாள் பிரதமரும், காங்கிரஸ் மூத்த தலைவருமான மன்மோகன் சிங் மற்றும் அவரது மனைவி குர்ஷரன் கவுர் ஆகியோர் கொரோனா தடுப்பூசியின் முதல் டோஸை போட்டுக் கொண்டனர். மேலும் பல்வேறு மாநில கவர்னர்கள், முதல்வர்கள், அமைச்சர்கள், மத்திய அமைச்சர்களும் தடுப்பூசி போட்டுக் கொண்டனர்.  

ஜம்மு-காஷ்மீர் லெப்டினன்ட் கவர்னர் மனோஜ் சின்ஹா, ஜம்முவில் உள்ள அரசு மருத்துவக் கல்லூரி மற்றும் மருத்துவமனையில் கொரோனா தடுப்பூசியின் முதல் டோஸை போட்டுக் கொண்டார்.  டெல்லி லெப்டினன்ட் கவர்னர் அனில் பைஜால், டிராத் ராம் ஷா மருத்துவமனையில் கொரோனா தடுப்பூசியின் முதல் டோஸை போட்டுக்கொண்டார்.  மத்திய நிதியமைச்சர் நிர்மலா சீதாராமன் டெல்லி வசந்த் குஞ்சில் உள்ள ஃபோர்டிஸ் மருத்துவமனையில் கொரோனா தடுப்பூசியின் முதல் டோஸை போட்டுக் கொண்டார்.  மத்திய சுற்றுலாத்துறை அமைச்சர் பிரஹலாத் சிங் படேல் டெல்லியில் உள்ள மருத்துவமனையில் கொரோனா தடுப்பூசியின் முதல் டோஸை போட்டுக் கொண்டார்.  டெல்லி முதல்வர்  கெஜ்ரிவால் மற்றும் அவரது பெற்றோர் எல்.என்.ஜே.பி மருத்துவமனையில் கொரோனா தடுப்பூசியின் முதல் டோஸை போட்டுக் கொண்டனர்.  இமாச்சலப் பிரதேச முதல்வர் ஜெய் ராம் தாக்கூர் சிம்லாவில் உள்ள மருத்துவமனையில்  கொரோனா தடுப்பூசியின் முதல் டோஸை போட்டுக் கொண்டனர்.