பார்லி., தொடர்ந்து 5 நாட்கள் முடக்கம்: மக்கள் வரிப்பணம் ரூ.600 கோடி அவுட்..!

புதுடெல்லி, பாராளுமன்றம் 5 நாட்கள் முடக்கபட்டதால் இதுவரை மக்கள் வரிப்பணம் ரூ.600 கோடி  வீணடிக்கப்பட்டுள்ளது.  

பீகார் மாநிலத்தில் வாக்காளர் பட்டியலில் சிறப்பு தீவிர திருத்தத்தை மேற்கொண்டு வரும் தேர்தல் கமிஷன் நடவடிக்கைக்கு எதிர்ப்பு தெரிவித்தும், ஆபரேஷன் சிந்தூர் நடவடிக்கை குறித்து அரசிடம் விளக்கம் கோரியும் எதிர்க்கட்சி உறுப்பினர்கள் கடும் அமளியில் ஈடுபட்டு வருகிறார்கள். இதனால், பாராளுமன்றத்தில் குறிப்பிடத்தக்க அலுவல்கள் எதுவும் நடைபெறவில்லை.

எதிர்க்கட்சிகளின் போராட்டமும் தொடர்ந்து கொண்டிருக்கும் நிலையில், ஆகஸ்ட் மாதம் 21-ந் தேதி வரை 21 நாட்கள் நடைபெற வேண்டிய பாராளுமன்ற கூட்டத்தில் இதுவரை 5 நாட்கள் முடக்கப்பட்டுவிட்டது. இதனால், மக்களின் வரிப்பணமும் கோடிக்கணக்கில் வீணடிக்கப்பட்டு வருகிறது.  

பாராளுமன்ற இரு அவைகளும் ஒரு மணி நேரம் கூடுவதற்கு சுமார் ரூ.20 கோடி செலவு செய்யப்படுகிறது. ஒரு நிமிடத்திற்கு ரூ.33 லட்சம் செலவாகிறது. அந்த வகையில், 6 மணி நேரம் நடைபெறும் ஒரு நாள் கூட்டத்திற்கு ரூ.120 கோடி செலவு செய்யப்படுகிறது. இதைவைத்து பார்க்கும்போது, 5 நாட்கள் பாராளுமன்ற முடக்கத்தை கணக்கில் எடுத்துக்கொண்டால், இதுவரை ரூ.600 கோடி மக்கள் வரிப்பணம் வீணடிக்கப்பட்டுள்ளது.  

இதே போல் எம்.பி.க்களுக்கு மாதச் சம்பளம் ரூ.1 லட்சம். தொகுதி நிதி ஆண்டுக்கு ரூ.5 கோடி. பாராளுமன்ற கூட்டத்தில் ஒருநாள் கலந்துகொண்டால் அதற்கான படி ரூ.2 ஆயிரம். தொகுதியில் மக்களை சந்திக்க மாதப்படி ரூ.70 ஆயிரம். அலுவலக செலவுக்கு மாதம் ரூ.60 ஆயிரம் என ஏராளமான தொகை வீணடிக்கப்பட்டுள்ளது குறிப்பிடத்தக்கது