கரூர் கூட்ட நெரிசல் சம்பவம்: யூடியூபர் மாரிதாஸ் கைதாகி விடுவிப்பு

சென்னை : கரூர் சம்பவம் தொடர்பாக சென்னை நீலாங்கரையில் யூடியூபர் மாரிதாஸை போலீசார் கைது செய்தனர். பின்னர் விசாரணை செய்த நிலையில் அவர் விடுவிக்கப்பட்டார்.

கரூரில் நடந்த த.வெ.க. தலைவர் விஜய் பிரசார கூட்ட நெரிசலில் 41 பேர் பலியான சம்பவம் நாட்டையே உலுக்கியுள்ளது. இந்த சம்பவம் தொடர்பாக சமூக வலைதளங்களில் தவறான தகவல்கள் பரப்பி வருவதாக கூறி 25 பேர் மீது சென்னை சைபர் கிரைம் போலீசார் வழக்குப்பதிவு செய்தனர்.

அவர்களில் சென்னை பெரும்பாக்கத்தைச் சேர்ந்த பா.ஜ.க. மாநில செயலாளர் சகாயம் (வயது 38), த.வெ.க. உறுப்பினர் மாங்காடு பகுதியைச் சேர்ந்த சிவனேஸ்வரன் (36), த.வெ.க. நிர்வாகி ஆவடியைச் சேர்ந்த சரத்குமார் (32) ஆகிய 3 பேரை போலீசார் கைது செய்தனர். மேலும் 22 பேரை தேடி வருகிறார்கள்.

இந்த நிலையில், கரூரில் விஜய் பிரசாரத்தில் 41 பேர் பலியான விவகாரத்தில் உண்மைக்கு மாறான தகவலை பரப்பியதாக கூறி யூடியூபர் மாரிதாஸ் கைது செய்யப்பட்டுள்ளார். சென்னை நீலாங்கரையில் உள்ள வீட்டில் வைத்து மாரிதாசை போலீசார் கைது செய்து விசாரணை நடத்தினர். அவரிடம் விசாரணை நடந்த நிலையில் பிறகு அவரை போலீசார் விடுவித்தனர்.  முன்னதாக இதே விவகராம் தொடர்பாக யூடியூபர் பெனிக்ஸ் கைது செய்யப்பட்டது குறிப்பிடத்தக்கது.