விவசாயிகளின் வாழ்வாதாரத்தை பா.ஜ பலவீனப்படுத்துவதாக குற்றச்சாட்டு

சண்டிகர் - அரியானாவில் ஆட்சியில் உள்ள பா.ஜனதா அரசு மாநில விவசாயிகளின்  வாழ்வாதாரத்தை பலவீனப்படுத்தி வருகிறது என்று முன்னாள் முதல்வர் பூபிந்தர்சிங் ஹூடா குற்றம் சாட்டியுள்ளார்.

அரியானாவில் 10 ஆண்டுகளுக்கும் மேலாக காங்கிரஸ் கட்சியை சேர்ந்த பூபிந்தர் சிங் ஹூடா முதல்வர் பதவி வகித்து வந்தார். நடந்து முடிந்த சட்டசபை தேர்தலில் பா.ஜனதா வெற்றி பெற்று மனோகர் லால் கட்டார் முதல்வராக பதவியேற்றுள்ளார். இந்த நிலையில் பா.ஜனதா அரசு முந்தைய காங்கிரஸ் ஆட்சியில் கொண்டு வந்த பல்வேறு திட்டங்களையும் மாற்றி அறிவித்து வருகிறது. இதனால் விவசாயிகள் கடுமையாக பாதிக்கப்படுகின்றனர் என்று முன்னாள் முதல்வர் ஹூடா குற்றம் சாட்டியுள்ளார்.

இதுகுறித்து அவர் சதார் கிராமத்தில் நிருபர்களுக்கு பேட்டியளித்தார். அப்போது அவர் கூறியதாவது, பா.ஜனதா அரசின் செயல்பாடுகளால் விவசாயிகள் கடுமையான நிதி நெருக்கடியை சந்தித்துள்ளனர். அவர்களின் வாழ்வாதாரம் பலவீனப்படுத்தப்பட்டு வருகிறது. உதாரணமாக கரும்பு விவசாயிகள் தங்களது உற்பத்தியை சர்க்கரை ஆலைகளுக்கு அனுப்பி வைத்து வருகின்றனர். நீண்ட காலமாகியும் அவர்களுக்கு உரிய கொள்முதல் விலையை கொடுக்க மாநில அரசு மறுத்து வருகிறது. பருவம் தவறிய மழையால் பாதிக்கப்பட்ட விவசாயிகளை காங்கிரஸ் தலைவர் சோனியா காந்தி நேரில் சந்தித்து அவர்களது குறைகளை கேட்டறிந்தார். ஆனால் மாநில அரசு இதில் எந்த கவனமும் காட்டவில்லை என்றார்.