தேர்தல் வியூக நிபுணர் பணியில் இருந்து விலகுவதாக பிரசாந்த் கிஷோர் அறிவிப்பு

புதுடெல்லி : மேற்கு வங்கத்தில் திரிணமூல் காங்கிரஸ், தமிழகத்தில் தி.மு.க. வெற்றி பெறும் சூழல் உள்ளது மகிழ்ச்சியை ஏற்படுத்தியுள்ளது, எனினும் தேர்தல் வியூக நிபுணர் பணியில் இருந்து விலகுகிறேன் என பிரசாந்த் கிஷோர் கூறியுள்ளார்.

மேற்கு வங்கத்தில் உள்ள 294 தொகுதிகளுக்கும் 8 கட்டங்களாகத் தேர்தல் நடைபெற்றது. ஆளும் திரிணமூல் காங்கிரஸ், பா.ஜ.க. இடையே கடும் போட்டி நிலவியது. இந்தத் தேர்தலில் திரிணமூல் காங்கிரஸ் கட்சிக்குத் தேர்தல் வியூகங்களை பிரசாந்த் கிஷோர் தலைமையிலான நிறுவனம் வகுத்துக் கொடுத்தது. பிரசாந்த் கிஷோர் முன்பு டுவிட்டரில் பதிவொன்றை வெளியிட்டு இருந்தார். அதில் குறிப்பிட்ட சில ஆதரவு ஊடகங்களின் அனைத்து விதமான பிரச்சாரங்களால் பா.ஜ.க. வலுவாகக் காண்பிக்கப்படுகிறது. உண்மையில், மேற்கு வங்கத்தில் நடக்கும் சட்டப்பேரவைத் தேர்தலில் பா.ஜ.க. இரட்டை இலக்கத்தில் தொகுதிகளை வெல்லவே தடுமாறப் போகிறது. ஒருவேளை சட்டப்பேரவைத் தேர்தலில் பா.ஜ.க. சிறப்பான வெற்றியைப் பெற்று விட்டால், நான் டுவிட்டரிலிருந்து விலகி விடுகிறேன் எனத் தெரிவித்தார்.

இந்தநிலையில் 5 மாநில சட்டப்பேரவைத் தேர்தலில் பதிவான வாக்குகள் நேற்று எண்ணப்பட்டன. இதில் பிரசாந்த் கிஷோர் வியூகம் வகுத்துக் கொடுத்த மேற்கு வங்கத்தில் திரிணமூல் காங்கிரஸ், தமிழகத்தில் தி.மு.க. வெற்றி பெறும் நிலை உள்ளது.

இதனைத் தொடர்ந்து தொலைக்காட்சிக்கு அவர் பேட்டியளித்துள்ளார். அதில் அவர் கூறியுள்ளதாவது:-

பிரதமர் மோடியின் பிரபலத்தை வைத்துக் கொண்டே எல்லா தேர்தல்களிலும் வெற்றி பெற முடியாது. இதனை உணர்ந்து கொள்ள வேண்டும். தமிழகத்திலும் தி.மு.க. வெற்றி பெற்றுள்ளது. மேற்கு வங்கத்தில் திரிணமூல் காங்கிரஸ் பெரும் வெற்றி பெற்றுள்ளது. நான் கூறியபடியே பா.ஜ.க. இரட்டை இலக்கத்தைத் தாண்டவில்லை.  இருந்தாலும் நான் அரசியல் வியூகப் பணியில் இருந்து விலகப் போகிறேன். 9 ஆண்டுகள் இந்தப் பணியைச் செய்து விட்டேன். போதும், இனிமேல் நான் எனது குடும்பத்தினருடன் காலத்தைச் செலவிடுகிறேன். எனது ஐபேக் நிறுவனத்தை அதில் உள்ள மற்ற நண்பர்கள் நடத்துவார்கள். இவ்வாறு பிரசாந்த் கிஷோர் கூறியுள்ளார்.