எதிர்க்கட்சி தலைவர்களுடன் சோனியா காந்தி ஆலோசனை

புது டெல்லி : காங்கிரஸ் தலைவர் சோனியா, எதிர்க்கட்சி தலைவர்களுடன் நேற்று ஆலோசனையில் ஈடுபட்டார்.

2024-ம் ஆண்டு நடைபெற உள்ள லோக்சபா தேர்தலில், பா.ஜ.க.வை வீழ்த்தும் நோக்கில், வலுவான கூட்டணியை அமைக்க எதிர்க்கட்சிகள் தீவிரம் காட்டி வருகின்றன. எனினும், கட்சிகளுக்கு இடையே உள்ள கருத்து வேறுபாடுகள் காரணமாக, அனைத்து எதிர்க்கட்சிகளும் ஒரே கூட்டணியில் இடம்பெறுவதில் சிக்கல் ஏற்பட்டுள்ளது. இந்நிலையில், கூட்டணி அமைக்கும் முயற்சியாக, காங்கிரஸ் தலைவர் சோனியா, எதிர்க்கட்சித் தலைவர்களுடன் நேற்று ஆலோசனை நடத்தினார்.

வீடியோ கான்பரன்ஸ் மூலம் நடந்த இந்த கூட்டத்தில் தேசியவாத காங்கிரஸ் தலைவர் சரத்பவார், மேற்கு வங்க முதல்வர் மம்தா பானர்ஜி, மகராஷ்டிரா முதல்வர் உத்தவ் தாக்கரே, தமிழக முதல்வர் ஸ்டாலின், ஜார்க்கண்ட் முதல்வர் ஹேமந்த் சோரன், ஐக்கிய ஜனதா தளம் தலைவர் சரத் யாதவ், மார்க்சிஸ்ட் கம்யூனிஸ்ட்டின் சீதாராம் யெச்சூரி உள்ளிட்டோர் பங்கேற்றனர். இந்த கூட்டத்தில், 2024 லோக்சபா தேர்தல், விவசாயிகள் பிரச்னை குறித்து ஆலோசிக்கப்பட்டதாக கூறப்படுகிறது.