சென்னை, தவறான செய்திகளை மக்கள் நம்ப வேண்டாம் என்று விஜயகாந்த் உடல்நிலை குறித்து தே.மு.தி.க. அறிக்கை வெளியிட்டுள்ளது.

தே.மு.தி.க. தலைவர் விஜயகாந்த் மார்புசளி, இடைவிடாத இருமல் காரணமாக கடந்த சனிக்கிழமை அன்று சென்னை நந்தம்பாக்கத்தில் உள்ள தனியார் மருத்துவமனையில் அனுமதிக்கப்பட்டார். இந்நிலையில், விஜயகாந்துக்கு நேற்று 3வது நாளாக தொடர்ந்து சிகிச்சை அளிக்கப்பட்டு வருகிறது. விஜயகாந்துக்கு அவ்வப்போது செயற்கை சுவாசம் தரப்படுவதாகவும் தகவல் வெளியானது. உடல்நல பரிசோதனைக்கு பிறகு நாளை வீடு திரும்புவார் என மருத்துவமனை வட்டாரங்கள் தெரிவிக்கின்றன.

இதற்கிடையே விஜயகாந்த் உடல்நிலை குறித்த வதந்திகளை யாரும் நம்ப வேண்டாம் என தே.மு.தி.க. அறிக்கை வெளியிட்டுள்ளது. இதுகுறித்து தே.மு.தி.க. வெளியிட்டுள்ள அறிக்கையில், 'தே.மு.தி.க. தலைவர் விஜயகாந்த் வழக்கமான மருத்துவ பரிசோதனைக்காக சென்று இருக்கிறார். அவர் ஓரிரு நாளில் வீடு திரும்புவார். செயற்கை சுவாசம் கொடுக்கப்படுவதாக தவறான செய்திகளை வெளியிடும் தொலைக்காட்சிகளை பார்த்து யாரும் நம்ப வேண்டாம். இது முற்றிலும் தவறான செய்தி. இதுபோன்ற வதந்திகளை நம்பவும் வேண்டாம், யாரும் பரப்பவும் வேண்டாம்' என்று தெரிவிக்கப்பட்டுள்ளது.