சி.எஸ்.ஐ.ஆர். நெட் தேர்வு ஒத்திவைப்பு : தேசிய தேர்வு முகமை அறிவிப்பு

புதுடெல்லி : முறைகேடு புகார் எதிரொலியாக யு.ஜி.சி. நெட் தேர்வு ஒத்திவைக்கப்பட்ட நிலையில், தற்போது சி.எஸ்.ஐ.ஆர். நெட் தேர்வும் ஒத்திவைக்கப்படுவதாக தேசிய தேர்வு முகமை அறிவித்துள்ளது.

அறிவியல் மற்றும் தொழில்துறை ஆராய்ச்சி கவுன்சிலான சி.எஸ்.ஐ.ஆர்., யு.ஜி.சி.யுடன் இணைந்து, வாழ்க்கை அறிவியல், வேதியியல் அறிவியல், இயற்பியல் அறிவியல், கணித அறிவியல் மற்றும் பூமி, வளிமண்டலம், பெருங்கடல் மற்றும் கிரக அறிவியல் ஆகிய 5 பாடங்களுக்கு நெட் தகுதி தேர்வை நடத்துகிறது. 

தேசிய தேர்வு முகமையினால் நடத்தப்படும் இத்தேர்விற்கு விண்ணப்பங்கள் கடந்த மே மாதம் 1-ம் தேதி முதல் தொடங்கி மே 27-ம் தேதி வரை பெறப்பட்டது. இதற்கான தேர்வு வரும் 25-ம் தேதி தொடங்கி  27-ம் தேதி வரை நடைபெற இருந்தது.

இந்நிலையில் தவிர்க்க முடியாத காரணங்களினால் தேர்வு ஒத்திவைக்கப்படுவதாக தேசிய தேர்வு முகமை அறிவித்துள்ளது. தேர்விற்கான புதிய அட்டவணை விரைவில் வெளியிடப்படும் என தெரிவிக்கப்பட்டுள்ளது.