கோரிக்கைகள் நிறைவேற்றப்பட்டால் மட்டுமே மீண்டும் பணிக்கு திரும்புவோம் - மே.வங்க பயிற்சி மருத்துவர்கள் திட்டவட்டம்

கொல்கத்தா,  மேற்கு வங்கத்தில் போராட்டத்தில் ஈடுபட்டுள்ள மருத்துவர்கள் நேற்று மாலை 5 மணிக்குள் பணிக்கு திரும்ப சுப்ரீம் கோர்ட் அறிவுறுத்தியிருந்த நிலையில், கோரிக்கைகள் நிறைவேற்றப்பட்டால் மட்டுமே பணிக்கு திரும்புவோம் என்று மேற்கு வங்க பயிற்சி மருத்துவர்கள் சங்கம் உறுதிபடத் தெரிவித்துள்ளது.

இது தொடர்பாக  மேற்கு வங்க பயிற்சி மருத்துவர்கள் முன்னணி வெளியிட்டுள்ள அறிக்கையில், 

எங்கள் கோரிக்கைகள் நிறைவேற்றப்பட்டால் மட்டுமே நீதிமன்றத்தின் உத்தரவை பரிசீலனை செய்வோம். இல்லையெனில், முட்டுக்கட்டையை முடிவுக்கு கொண்டுவர அரசாங்கம் விரும்பவில்லை என்றே நாங்கள் புரிந்துகொள்வோம். அப்படியானால், மாநிலம் முழுவதும் ஏற்படும் சூழ்நிலைக்கு நாங்கள் அரசாங்கத்தை பொறுப்பாக்குவோம்.  மருத்துவமனைகளில் போதிய பாதுகாப்பு ஊழியர்கள் நியமிக்கப்பட வேண்டும்.

சி.சி.டி.வி. கேமராக்கள் நிறுவப்பட வேண்டும். கொல்கத்தா காவல்துறைத் தலைவரை அகற்ற வேண்டும் உள்ளிட்ட கோரிக்கைகளை நாங்கள் தொடர்ந்து முன்வைத்து வருகிறோம். இந்தச் சம்பவத்திற்குப் பிறகு ஒரு சி.சி.டி.வி. கேமராகூட நிறுவப்படவில்லை. ஓய்வெடுக்கும் அறை இல்லை. ஆண்களுக்கும் பெண்களுக்கும் தனித்தனி கழிப்பறைகள் இல்லை என தெரிவிக்கப்பட்டுள்ளது.

போராட்டத்தில் ஈடுபட்டுள்ள பயிற்சி மருத்துவர்கள் தங்கள் போராட்டத்தை முடித்துக் கொள்ள சுப்ரீம் கோர்ட் அறிவுறுத்தியிருந்த நிலையில், மேற்கு வங்க பயிற்சி மருத்துவர்கள் முன்னணி தங்கள் நிலைப்பாட்டில் தாங்கள் உறுதியாக இருப்பதாக அறிவித்திருப்பது குறிப்பிடத்தக்கது.