2K லவ் ஸ்டோரி விமர்சனம்

ஆண் - பெண் நட்பாக பழகினாலே நாளடைவில் அது காதலாக மாறிவிடும் சூழலில், ஒரு ஆணும், பெண்ணும்  நண்பர்களாக மட்டுமே இருக்க முடியும், என்பதற்கு எடுத்துக்காட்டாக நாயகனும் நாயகியும் இருக்கிறார்கள். அவர்கள் ஒருவர் மீது ஒருவர் வெளிக்காட்டும் அன்பு காதல்தான் என பலரும் நினைக்க, அவற்றை கடந்து நண்பர்களாகவே பயணிக்கிறார்கள். அந்த பயணம் தொடர்ந்ததா? இல்லை தடம் மாறியதா என்பது தான் ’2K லவ் ஸ்டோரி படம். அறிமுக நடிகர் ஜெகவீர், குறையில்லாத நடிப்போடு தனது கதாபாத்திரத்திற்கு நியாயம் சேர்த்திருக்கிறார். நாயகியாக நடித்திருக்கும் மீனாட்சியின் முகம் மட்டுமல்ல நடிப்பும் அழகுதான். புதுவரவு லத்திகா பாலமுருகன்,பால சரவணன், ஆண்டனி பாக்யராஜ், உள்ளிட்ட அனைவரும் சிறப்பாக நடித்திருக்கிறார்கள். இமான் இசையில் பாடல்கள் அனைத்தும் இதமாக பயணிக்கிறது. ’புது வசந்தம்’ நட்புக்கு பிறகு மீண்டும் ஒரு நட்பு புரட்சியை ஏற்படுத்தியிருக்கிறார் இயக்குநர் சுசீந்திரன்.  திரைக்கதையில் பெற்றோர் மற்றும் நண்பர்களுக்கு முக்கியத்துவம் கொடுத்திருக்கும் இயக்குநர் சுசீந்திரன், குடும்பத்துடன் பார்க்க கூடிய ஒரு அழகான காதல் கதையாக மட்டும் இன்றி தற்போதைய இளைஞர்களின் நட்புக்கு மரியாதை கொடுக்கும் படைப்பாகவும் கொடுத்திருக்கிறார்.  மொத்தத்தில், ’2K லவ் ஸ்டோரி’ காதலர்களுக்கானது மட்டும் அல்ல, அனைவருக்குமானது.