சித்து நடிக்கும் தி டார்க் ஹெவன்

கோதை என்டர்டெய்ன்மென்ட் மற்றும் எஸ். எம். மீடியா பேக்டரி இணைந்து தயாரித்துள்ள திரைப்படம் தி டார்க் ஹெவன். க்ரைம் திரில்லர் படமாக உருவாகியுள்ள இதில், சின்னத்திரை நடிகர் சித்து நாயகனாகவும் நாயகிகளாக தர்ஷிகா, ரித்விகா ஆகியோர் நடித்திருக்கிறார்கள். இவர்களுடன் வேல ராமமூர்த்தி, நிழல்கள் ரவி, அருள்ஜோதி, ஜெயக்குமார், ஷரண், ஜானகிராமன் ,விஜய் சத்யா, ஆர்த்தி, சுமித்ரா, உள்ளிட்ட பலர் நடித்துள்ளனர். பாலாஜி இயக்கியிருக்கும் இப்படத்தின் டீசர் வெளியீட்டு விழா சென்னையில் சமீபத்தில் நடைபெற்றது. இதில், படக்குழுவினருடன் பிரபல இயக்குநர் மித்ரன் ஆர்.ஜவகர் சிறப்பு விருந்தினராக கலந்து கொண்டார். நிகழ்ச்சியில் இயக்குநர் பாலாஜி பேசுகையில், ஒரு மலைக் கிராமத்தில்  ஒவ்வொரு ஏழு  ஆண்டுக்குப் பிறகு வருகிற ஜூன் மாதத்தில் ஆண்கள் எல்லாம் இறந்து போவார்கள் என்பது நம்பிக்கை. இதை அடிப்படையாக வைத்துத்தான் டார்க் அந்தத் தலைப்பை வைத்தோம் என்றார். படத்தின் நாயகன் சித்து பேசுகையில்,  எல்லாரையும் போலவே நல்ல படம், நல்ல பாத்திரம் செய்ய வேண்டும் என்று ஆசை இருந்தது. ஒரு நாள் என்னை இயக்குநர் பாலாஜி தொலைபேசியில் அழைத்தார். போய்ச் சந்தித்தேன், கதை கூறினார். நன்றாக இருந்தது. போலீஸ் வேடம் என்றபோது எனக்கு ஒரு நம்பிக்கை வந்தது. இந்தப் படத்தில் அவர் எடுத்திருக்கும் காட்சிகளைப் பார்க்கும்போது எந்தக் குறையும் சொல்ல முடியாது. நள்ளிரவு இரண்டு மணிக்குப்  படப்பிடிப்பு நடக்கும். இருந்தாலும் அவர் அசராமல் இருப்பார் என்றார்.