மதுரை,ஏப்.- 23 - புனித வெள்ளியான நேற்று தேவாலயங்களில் கிறிஸ்வர்கள் சிறப்பு பிரார்த்தனையில் ஈடுபட்டனர்.     இயேசு கிறிஸ்துவின் சிலுவை வழிபாடுகளை நினைவு கூறும் வகையில் உலகம் முழுவதும் கடந்த 40 ஆண்டுகளாக கிறிஸ்தவர்கள் தவக்கால நோன்பு அனுசரித்து வருகிறார்கள். சாம்பல் புதனில் தொடங்கி தேவாலயங்களில் தினமும் சிறப்பு பிரார்த்தனைகள் நடந்தன. கிறிஸ்தவர்கள் நோன்பு கடைபிடித்து இந்த பிரார்த்தனையில் கலந்து கொண்டனர்.  நேற்று முன்தினம் தேவாலயங்களில் பாதம் கழுவும் நிகழ்ச்சி நடைபெற்றது. நேற்று மாலை மதுரை தூயமரியன்னை பேராலயத்தில் சிலுவை சுமக்கும் நிகழ்வுகளும் நடந்தன. இயேசு கிறிஸ்து சிலுவையில் அறையப்பட்டு உயிர்நீத்த புனித வெள்ளி நேற்று உலகம் முழுவதும் கடைபிடிக்கப்பட்டது. மதுரையில் நரிமேடு, புதூர், கீழவாசல், பெரியார்பஸ்நிலையம், தெற்குவாசல் காளவாசல், அண்ணாநகர் உள்ளிட்ட மதுரையில் அனைத்து கிறிஸ்தவ தேவாலயங்களிலும் நேற்று சிறப்பு பிரார்த்தனைகள் நடைபெற்றன. இதில் ஏராளமான கிறிஸ்தவ பெருமக்கள் கலந்து கொண்டனர்.

   இயேசு கிறிஸ்து 3ம் நாள் உயிர்த்தெழுந்ததை கொண்டாடும் ஈஸ்டர் பண்டிகை நாளை(ஞாயிற்றுக்கிழமை) கொண்டாடப்படுகிறது. கிறிஸ்வர்கள் புத்தாடை அணிந்து  தேவாலயங்களில் நடைபெறும் சிறப்பு திருப்பலியில் கலந்து கொள்கிறார்கள்.