முதல்வர் பற்றி அவதூறு பேச்சு: கோர்ட்டில் பிரேமலதா ஆஜர்

திருப்பூர், ஜூலை. 3 - திருப்பூர் பத்மினி கார்னரில் கடந்த ஆண்டு ஆகஸ்ட் 21 ம் தேதி தே.மு.தி.க. சார்பில் நடைபெற்ற விழாவில் விஜயகாந்த் கலந்து கொண்டார். அப்போது முதல்வர் ஜெயலலிதா மீது களங்கம் விளைவிக்கும் வகையில் அவதூறாக பேசியதாக விஜயகாந்த் மீது திருப்பூர் மாவட்ட முதன்மை அமர்வு நீதிமன்றத்தில் அரசு வக்கீல் சுப்பிரமணியம் அவதூறு வழக்கு தொடர்ந்தார். 

இந்த வழக்கில் ஆஜராகும்படி விஜயகாந்துக்கு சம்மன் அனுப்பப்பட்டது. ஆனால் அவர் ஆஜராகவில்லை. இந்த வழக்கு ஜூன் 13 ம் தேதி மீண்டும் விசாரணைக்கு வந்த போதும் விஜயகாந்த் ஆஜராகவில்லை. அவர் தரப்பில் ஆஜரான வக்கீல் விஜயகாந்துக்கு உடல் நிலை சரியில்லாத காரணத்தால் நேரில் ஆஜராகவில்லை என்று கூறினார். இதையடுத்து விசாரணை நேற்று 2 ம் தேதிக்கு ஒத்தி வைக்கப்பட்டது. 

இதற்கிடையே மின்வெட்டை கண்டித்து தே.மு.தி.க. சார்பில் திருப்பூர் ஊத்துக்குளி ரோட்டில் நடந்த பொதுக்கூட்டத்திலும் விஜயகாந்த் முதல்வரை அவதூறாக பேசியதாக மாவட்ட அரசு வக்கீல் சுப்பிரமணியம் வழக்கு தொடர்ந்தார். இந்த அவதூறு வழக்கு விஜயகாந்த், அவரது மனைவி பிரேமலதா உள்ளிட்ட தே.மு.தி.க. நிர்வாகிகள் 5 பேர் ஆஜராகுமாறு கோர்ட் உத்தரவிட்டது. மேற்கண்ட இரு வழக்குகளும் நேற்று விசாரணைக்கு வந்தது. அப்போதும் விஜயகாந்த் ஆஜராகவில்லை. அவரது மனைவி பிரேமலதா மட்டும் ஆஜரானார். 

விஜயகாந்துக்கு உடல் நிலை சரியில்லை என்று வக்கீல் ரகுபதி மனு தாக்கல் செய்து 2 மாத காலம் அவகாசம் கேட்டார். இதையடுத்து நீதிபதி கணேசன் வழக்கு விசாரணையை 30 ம் தேதிக்கு தள்ளிவைத்து உத்தரவிட்டார். கோர்ட்டில் இருந்து வெளியே வந்த பிரேமலதா நிருபர்களிடம் கூறியதாவது, தே.மு.தி.க. மக்கள் பிரச்சினைக்காக எப்போதும் போராடும் கட்சியாகும். மக்கள் பிரச்சினைக்காக கோர்ட்டுக்கு வந்தது மகிழ்ச்சியளிக்கிறது. கோர்ட், வழக்கு போன்றவைகளால் தே.மு.தி.க.வை முடக்க முடியாது. மக்கள் நலப் பணிகள் தொடர்ந்து நடைபெறும் என்றார் அவர்.