கனடாவில் விமான விபத்து - 12 பேர் பலி

டொரண்டோ,ஆக.23 - வட அமெரிக்க நாடான கனடாவின் ஆர்டிக் பகுதியில் விமானம் ஒன்று விழுந்து நொறுங்கியதில் 12 பேர் இறந்தனர். 3 பேர் படுகாயமடைந்தனர். கனடா நாட்டில் உள்ள யெல்லொ நைப் நகரில் இருந்து ரிசோலுட் பே பகுதிக்கு போயிங் விமானம் ஒன்று சென்று கொண்டிருந்தது. விமானத்தில் பயணிகள் மற்றும் விமான சிப்பந்திகள் உட்பட 15 பேர் பயணம் செய்தனர். நுநாவட் பகுதியில் அந்த விமானம் தரையிறங்குவதற்காக விமான ஓடுபாதையை நோக்கி இறங்கிய போது அருகில் இருந்த மலைக் குன்றின் மீது மோதி வெடித்து சிதறியது. அதில் பயணம் செய்தவர்களில் 12 பேர் சம்பவ இடத்திலேயே இறந்தனர். மூவர் மருத்துவமனையில் சிகிச்சை பெற்று வருவதாக மீட்பு பணி அதிகாரி தெரிவித்தார். இந்த விமான விபத்தால் தாம் ஆழ்ந்த கவலையடைந்துள்ளதாக கனடா பிரதமர் ஸ்டீபன் ஹார்பர் தெரிவித்துள்ளார்.