புயலால் பாதிக்கப்பட்டோருக்கு உடனடி நிவாரணம்

காரைக்கால், டிச. 31 - காரைக்கால் மாவட்டம் வடக்கு சட்டமன்ற தொகுதி உறுப்பினர் பி.ஆர்.என். திருமுருகன் தானே புயலால் பாதிக்கப்பட்ட பல்வேறு பகுதிகளை சென்று பார்வையிட்டார். மேலும் மீனவ கிராமங்களான காசாகுடி, கிளிஞ்சன் மேடு, காரைக்கால் மேடு ஆகிய பகுதிகளுக்கு கடல் அரிப்பால் நீர் புகுந்த பகுதிகளையும், புயலால் பாதிக்கப்பட்ட படகுகள் மற்றும் சேதமடைந்த மீன் வலைகள், குடிசைகள் ஆகியவற்றை எம்.எல்.ஏ திருமுருகன் பார்வையிட்டார். பின்னர் செய்தியாளர்களுக்கு பேட்டியளித்த அவர் கூறுகையில், 

தானே புயல் சீற்றத்தால் மீனவ கிராமங்களான காசாகுடிமேடு, கிளிஞ்சல் மேடு, காரைக்கால் மேடு ஆகிய பகுதிகளில் குடியிருப்பு வரை கடல் நீர் புகுந்துள்ளது. இதனால் கரையில் நிறுத்தி வைக்கப்பட்டிருந்த படகுகள், மீன் வலைகள் மற்றும் குடிசைகள் சேதம் அடைந்துள்ளது. இதே நிலை இயற்கை சீற்றத்தினால் மேலும் தொடராமல் இருக்க புதுவை அரசு உடனடியாக கருங்கல் கொட்டி கடல் நீர் அரிக்காதவண்ணம் திருப்பு அணை அமைக்க வேண்டும். பாதிக்கப்பட்ட மீனவர்களுக்கு நிவாரணம் வழங்க வேண்டும். மேலும் வடக்கு தொகுதியில் உள்ள குடிசை பகுதியில் மழை நீர் புகுந்துள்ளது. அறுவடைக்காக காத்திருக்கும் பல ஏக்கர் விளைநிலங்கள் நீரில் மூழ்கி உள்ளன. எனவே போர்க்கால அடிப்படையில் தானே புயலால் பாதிக்கப்பட்ட காரைக்கால் பகுதி மக்களுக்கு உடனடி நிவாரணம் அரசு வழங்க வேண்டும் என்று அவர் வலியுறுத்தினார்.