பொருளாதார நிபுணர் அபிஜித் பிரதமர் மோடியுடன் சந்திப்பு

புது டெல்லி : பிரதமர் நரேந்திர மோடியை பொருளாதார நிபுணர் அபிஜித் பானர்ஜி நேற்று சந்தித்து பேசினார். 

டெல்லியில் பிரதமரை அவரது இல்லத்தில் சந்தித்து பொருளாதார நிலவரம் குறித்து அபிஜித் பானர்ஜி விவாதித்தார். இது தொடர்பாக பிரதமர் மோடி தனது டுவிட்டர் பக்கத்தில் பதிவிட்டுள்ளார். அந்தப் பதிவில், அபிஜித் பானர்ஜியுடனான சந்திப்பு வெகு சிறப்பாக அமைந்தது. இந்தச் சந்திப்பின் வாயிலாக சாமானியர்களின் அதிகார மேம்பாட்டின் மீது அபிஜித் கொண்டுள்ள ஆர்வம் தெளிவாக வெளிப்பட்டது. இருவரும் பல்வேறு விஷயங்கள் குறித்தும் விரிவாக ஆலோசித்தோம். அபிஜித்தின் சாதனைகளைக் கண்டு இந்தியா பெருமிதம் கொள்கிறது. அவருடைய எதிர்காலப் பணிகள் சிறக்க மனமார்ந்த வாழ்த்துகள் எனப் பதிவிட்டுள்ளார்.

அபிஜித் பானர்ஜி, எஸ்தர் டுஃப்லோ, மைக்கேல் கிரெமர் மூவருக்கும் இந்த ஆண்டுக்கான பொருளாதார நோபல் பரிசு அறிவிக்கப்பட்டிருக்கிறது. நோபல் பரிசு அறிவிக்கப்பட்டவுடன் இந்திய அரசு அபிஜித்துக்கு வாழ்த்து தெரிவித்தது. இந்நிலையில்தான் அபிஜித் பானர்ஜி இந்தியப் பொருளாதாரம் மீது காத்திரமான விமர்சனத்தை முன்வைத்தார். அண்மையில் ஒரு நிகழ்ச்சியில் பேசிய அபிஜித், என் பார்வையில், இந்திய பொருளாதாரம் மோசமாக சென்று கொண்டிருக்கிறது. இந்திய பொருளாதாரத்தில் பிரச்சினை உள்ளது என்பதை அரசு உணர்ந்து வருகிறது. ஆனால், பிரச்சினையை உணரும் வேகத்தைவிட பொருளாதார மந்தநிலை மோசமடைந்து வருகிறது. தேவை தான் தற்போதைய பெரிய பிரச்சினை என நினைக்கிறேன். தேவைகள் குறைந்து வருவதால் தான் பொருளாதார மந்தநிலை நிலவி வருகிறது. தேவையை அதிகரிக்க முயற்சி செய்ய வேண்டும் என்று தெரிவித்திருந்தது குறிப்பிடத்தக்கது.