பிரிக்ஸ் மாநாட்டில் பங்கேற்க பிரதமர் மோடி வரும் 13-ம் தேதி பிரேசில் பயணம்

புது டெல்லி : 11-வது பிரிக்ஸ் மாநாட்டில் பங்கேற்க வரும் 13-ம் தேதி பிரதமர் மோடி பிரேசில் செல்ல உள்ளார் என வெளியுறவுத்துறை அமைச்சகம் தெரிவித்துள்ளது.

பிரேசில், ரஷ்யா, இந்தியா, சீனா, தென்னாப்பிரிக்கா ஆகிய ஐந்து நாடுகள் பிரிக்ஸ் அமைப்பில் அங்கம் வகிக்கின்றன. பொருளாதார ஒத்துழைப்பு, வணிகம் ஆகிய துறைகளில் கூட்டாக பங்களிப்பு அளிக்கும் விதமாக ஒவ்வொரு ஆண்டும் இந்த அமைப்பின் உச்சி மாநாடு கூடுகிறது. புதிய எதிர்காலத்திற்கான பொருளாதார வளர்ச்சி என்ற தலைப்பில் இந்த ஆண்டு 11-வது பிரிக்ஸ் உச்சி மாநாடு வரும் 13 மற்றும் 14-ம் தேதிகளில் பிரேசில் நாட்டில் நடைபெற உள்ளது. இந்நிலையில், பிரிக்ஸ் மாநாட்டில் கலந்து கொள்ள பிரதமர் மோடி வரும் 13-ம் தேதி பிரேசில் செல்ல உள்ளார். ஐந்து நாடுகளுக்கு இடையேயான கூட்டுறவை மேம்படுத்துவது பற்றி அதில் விவாதிக்கப்படும் என வெளியுறவுத்துறை செயலாளர் (பொருளாதார உறவுகள்) திருமூர்த்தி தெரிவித்துள்ளார். கடந்த ஆண்டு பிரிக்ஸ் மாநாடு தென் ஆப்பிரிக்கா நாட்டில் உள்ள ஜோகன்னஸ்பெர்க் நகரில் நடைபெற்றது குறிப்பிடத்தக்கது.