43 அணிகள் பங்கேற்கும் ‘ஏ’ டிவிசன் ஆக்கி லீக் - சென்னையில் இன்று தொடக்கம்

சென்னை : சென்னை ஆக்கி சங்கம் சார்பில் ‘ஏ’ டிவிசன் ஆக்கி லீக் போட்டி சென்னை எழும்பூரில் உள்ள மேயர் ராதாகிருஷ்ணன் ஸ்டேடியத்தில் இன்று (வெள்ளிக்கிழமை) தொடங்குகிறது.

இதில் ஏர் இந்தியா, தமிழ்நாடு மின்சார வாரியம், ஸ்டேட் வங்கி, தபால் துறை, ஆயுதப்படை போலீஸ், சாய் உள்பட 43 அணிகள் கலந்து கொள்கின்றன. அவை 8 பிரிவாக பிரிக்கப்பட்டுள்ளன. ஒவ்வொரு அணியும் தங்கள் பிரிவில் உள்ள மற்ற அணிகளுடன் தலா ஒரு முறை மோத வேண்டும். லீக் முடிவில் ஒவ்வொரு பிரிவிலும் முதலிடம் பிடிக்கும் அணிகள் கால்இறுதிக்கு தகுதி பெறும்.

தொடக்க நாளான இன்று பிற்பகல் 2.30 மணிக்கு நடைபெறும் முதல் லீக் ஆட்டத்தில் தமிழ்நாடு மின்சார வாரியம்-ஆர்.வி. அகாடமி அணிகள் மோதுகின்றன. இந்த தகவலை சென்னை ஆக்கி சங்க செயலாளர் எம்.எஸ்.உதயகுமார் தெரிவித்துள்ளார்.