வரும் 22, 23-ம் தேதிகளில் கோவையில் முதல்வர் எடப்பாடி பழனிசாமி பிரச்சாரம்: 25 இடங்களில் பேசுகிறார்

சென்னை : வெற்றி நடை போடும் தமிழகம் என்ற பெயரில் முதல்வர் எடப்பாடி பழனிசாமி, தமிழகம் முழுவதும் சுற்றுப்பயணம் செய்து பிரச்சாரம் மேற்கொண்டு வருகிறார். வருகிற 22 மற்றும் 23-ம் தேதிகளில் அவர் கோவை மாவட்டத்தில் பிரச்சாரம் செய்கிறார். 

22-ம் தேதி காலை 8 மணிக்கு கோவை தெற்கு தொகுதிக்கு உட்பட்ட ராஜ வீதியில் இருந்து முதல்வர் எடப்பாடி பழனிசாமி பிரச்சாரத்தை தொடங்குகிறார்.  அதைத் தொடர்ந்து செல்வபுரம், குனியமுத்தூர், கரும்புக்கடை, சுந்தராபுரம், மதுக்கரை மார்க்கெட், கிணத்துக்கடவு, கோவில்பாளையம் ஆகிய இடங்களில் பேசுகிறார். 

மதிய உணவுக்கு பின்னர் பிற்பகல் 3 மணிக்கு பொள்ளாச்சி திருவள்ளுவர் திடல், ஆனைமலை, மாசாணியம்மன் கோவில், சுல்தான்பேட்டை, சூலூர் வழியாக கொடிசியா வருகிறார். அங்கு இரவு 8 மணிக்கு தொழில் அதிபர்களை சந்தித்து பேசுகிறார். அன்று இரவு அவர் கோவை ரேஸ்கோர்சில் உள்ள அரசு விருந்தினர் மாளிகையில் தங்குகிறார். 

மறுநாள் (23-ம் தேதி) காலை 8 மணிக்கு முதல்வர் எடப்பாடி பழனிசாமி புலியகுளத்தில் இருந்து பிரச்சாரத்தை தொடங்குகிறார். தொடர்ந்து சிங்காநல்லூர், பீளமேடு புதூர், காளப்பட்டி, அன்னூர் மேட்டுப்பாளையம், ரங்கநாதர் கோவில் ஆகிய இடங்களில் பிரச்சாரத்தை முடித்துக் கொண்டு மதிய உணவு சாப்பிடுகிறார். 

பின்னர் மாலை 3 மணிக்கு பெரியநாயக்கன் பாளையம், துடியலூர், சாய்பாபா கோவில், வடவள்ளி, தொண்டாமுத்தூர், கோனியம்மன் கோவில் ஆகிய இடங்களில் பிரச்சாரம் மேற்கொள்கிறார். முதல்வர் எடப்பாடி பழனிசாமியின் தேர்தல் சுற்றுப்பயணத்துக்கான ஏற்பாடுகளை அமைச்சர் எஸ்.பி. வேலுமணி மற்றும் கட்சி நிர்வாகிகள் செய்து வருகின்றனர்.